വരവേല്‍ക്കാം പുണ്യ റബീഉല്‍ അവ്വല്‍ മാസത്തെ..!


വരവേല്ക്കാം് പുണ്യ റബീഉല്‍ അവ്വല്‍ മാസത്തെ..!

ഹിജ്റ പുതുവര്‍ഷത്തിന്‍റെ പ്രാരംഭ മാസം മുഹറം വിടചൊല്ലി പുണ്യ റബീഅയെ തൊട്ടുരുമ്മി നില്‍ക്കുന്ന സഫര്‍ മാസം ഏതാനും ദിനങ്ങള്‍ കഴിഞ്ഞാല്‍ നമ്മോടു വിടപറയുകയാണ്, പരിശുദ്ദ റബീഉല്‍ അവ്വല്‍ മാസത്തെ വരവേല്‍ക്കാന്‍ വിശ്വാസികള്‍ മനസാ വാചാ കര്‍മ്മണ ഒരുങ്ങി കഴിഞ്ഞു.

റബീഉല്‍ അവ്വല്‍ എന്നാല്‍ ‘വസന്തത്തിന്‍റെ ആദ്യ മാസം’ എന്നാണ്, വസന്തകാലം കടുത്ത ചൂടോ തണുപ്പോ ഇല്ലാത്ത, ഏറ്റവും സുന്ദരവും സൌമ്യവുമായ കാലമാണ്. എന്തു കൊണ്ടാണ് നബി(സ)യുടെ ജനനം ആ മാസത്തിലായത്? ഒരു പക്ഷെ പ്രവാചക പ്രവരന്‍ റമദാനിലോ ശഅ്ബാനിലോ മറ്റ് വിശുദ്ധ മാസങ്ങളില്‍ ഏതെങ്കിലുമൊന്നിലോ ആയിരുന്നു പിറന്നിരുന്നതെങ്കില്‍, ആ മാസങ്ങളുടെ പവിത്രത കൊണ്ട് തിരുനബി മഹത്വവത്കരിക്കപ്പെടുന്നതായി ആളുകള്‍ ചിന്തിക്കാവുന്നതാണ്. പക്ഷേ, മുത്ത്‌ നബി(സ) തങ്ങള്‍ റബീഉല്‍ അവ്വലില്‍ ജനിക്കുന്നതോടെ ആ ഒരൊറ്റക്കാരണം കൊണ്ട് ആ മാസമാണ് പവിത്രീകരിക്കപ്പെടുന്നത്. അതെ ലോക ഗുരുവിന്റെ ജന്മദിനത്തിന് സാന്നിധ്യം നല്‍കിയത് കൊണ്ടാണ് വിശുദ്ധ റബീഉല്‍ അവ്വല്‍ വിശ്വാസികളില്‍ ആവേശമുയരുന്നത്. വിശ്വാസിയുടെ ഹൃദയം സന്തോഷത്താല്‍ ആനന്ദപൂരിതമാകും, മസ്ജിദുകളില്‍ നിന്നുയരുന്ന മദ്ഹു ഗീതങ്ങള്, സ്വലാത്ത് ധ്വനികള്, ഓത്തു പള്ളികളില്‍ കുട്ടികള്‍ ആവേശത്താല്‍ മുഴക്കുന്ന “യാ നബി സലാം ………” ഈരടികള്, അതെ അവിടത്തേക്ക് സ്വലാത്തുകള്‍ വര്‍ദ്ധിപ്പിച്ചും, അവിടത്തെ മദ്ഹു ആലപിച്ചും ആ പുണ്യ മാസത്തെ വരവേല്‍ക്കാന്‍ ലോകത്തിലെ എല്ലാ വിശ്വാസികളും തയ്യാറെടുക്കുകയാണ്.

ആത്മീയ ആവേശത്തോടെ പുണ്യ റബീഇനെ വാരിപ്പുണരാന്‍ വെമ്പല്‍ കൊള്ളുന്ന ഓരോ വിശ്വാസിയും പുണ്യ പ്രവാചകന്‍ (സ) തങ്ങള്‍ പഠിപ്പിക്കുകയും ഊന്നിപ്പറയുകയും ചെയ്ത വിശ്വാസികള്‍ തമ്മില്‍ ഉണ്ടായിരിക്കേണ്ട പരസ്പരം സ്നേഹവും സഹോദര്യവും അത് വീണ്ടെടുക്കുകയും ഊട്ടിയുറപ്പിക്കുകയും ചെയ്യേണ്ട സമയം കൂടിയാണ്. “അനസില്‍(റ)നിന്ന്: നബി(സ്വ) പറഞ്ഞു: നിങ്ങള്‍ പരസ്പരം ദേഷ്യപ്പെടുകയോ അസൂയ കാണിക്കുകയോ അന്യോന്യം പുറംതിരിഞ്ഞ് (പിണങ്ങി) നില്‍ക്കുകയോ ചെയ്യരുത്. അല്ലാഹുവിന്റെ അടിയാറുകളേ, നിങ്ങള്‍ സഹോദരങ്ങളാവുക. മൂന്ന് ദിവസത്തിലധികം തന്റെ സഹോദരനുമായി (മുസ്ലിമുമായി) പിണങ്ങിനില്‍ക്കല്‍ മുസ്ലിമിന് അനുവദനീയമല്ല”. പരസ്പരം സഹോദരങ്ങളാവണമെന്ന് വിശ്വാസികളെ ശക്തമായി ഉപദേശിച്ചുകൊണ്ട് അവിടെന്ന് പ്രവാചകന്‍(സ്വ) പറയുകയുണ്ടായി “അല്ലാഹുവിന്റെ ദാസന്‍മാരേ, നിങ്ങള്‍ സഹോദരങ്ങളാവുക. ഒരു മുസ്ലിം മറ്റൊരു മുസ്ലിമിന്റെ സഹോദരനാണ്. അവനോട് അക്രമം കാണിക്കുകയില്ല; അവനെ കൈവെടിയുകയില്ല; അവനെ നിസ്സാരനായി കാണുകയില്ല. എന്നിട്ട് മൂന്ന് തവണ നെഞ്ചിലേക്ക് ചൂണ്ടിക്കൊണ്ട് പ്രവാചകന്‍(സ്വ) പറഞ്ഞു: ഇവിടെയാണ് തഖ് വ, തന്റെ സഹോദരനായ മുസ്ലിമിനെ നിന്ദിക്കുന്നതുതന്നെ തിന്മയായി ഒരാള്‍ക്ക് മതി. തന്റെ സഹോദരന്റെ രക്തവും സമ്പത്തും അഭിമാനവുമെല്ലാം ഓരോ മുസ്ലിമിനും നിഷിദ്ധമാണ്” ഈ പ്രവാചക വചനം ഉള്‍ക്കൊണ്ട്‌ വര്‍ത്തിക്കാന്‍ പുണ്യ റബീഅ നമ്മുക്ക് പ്രചോദനം നല്‍കുന്നതാവട്ടെ എന്ന് പ്രാര്‍ത്ഥിക്കുന്നു.

എല്ലാവര്‍ഷവും, റബിഉല്‍ അവ്വല്‍ മാസം വന്നണയുമ്പോള്‍ ദൈവത്തിന്റെ മഹാനായ പ്രവാചകന്റെ തിരുപ്പിറവിയുടെ സ്മരണ സര്‍വ പ്രപഞ്ചങ്ങളെയും സൌരഭ്യമണിയിക്കുകയാണ്, തിരുമേനിയുടെ ജീവചരിത്ര ഗ്രന്ഥങ്ങള്‍ വായിച്ചുകൊണ്ടും അതില്‍ നിന്ന് അനര്‍ഘമായ പാഠങ്ങള്‍ ഉള്‍ക്കൊണ്ടു കൊണ്ടും കോടിക്കണക്കിന് മുസ്ലിംകള്‍ ലോകമെമ്പാടും ആ മഹാസുദിനം ആഘോഷിക്കുന്നു. തിരുമേനിയുടെ ജീവിതഗാഥ ചൊല്ലുകയും ആബാലവൃദ്ധം ജനങ്ങളിലേക്കും അതു വഴി മഹാഗുരുവിന്റെ സന്ദേശമെത്തിക്കുകയും ചെയ്യുന്നു.

പ്രവാചക സ്നേഹവും തിരുനാളിനോടും ജീവിത ദൌത്യത്തോടുമുള്ള ആദരവും ഏതൊരു മനുഷ്യനും എല്ലാ നന്മയും പ്രദാനം ചെയ്യും. മുസ്ലിമിന്‍റെ സ്നേഹം ജഢികമല്ല. ആത്മീയമാണ്. അവന്‍ മുത്ത്‌ നബിയെ ഹൃദയം നിറഞ്ഞ് സ്നേഹിക്കുന്നു, ആ സ്നേഹം സ്വലാത്തായി, ദിക്ക്റായി മൗലിദായി, വിളിയായി ഒഴുകുന്നു.

എന്നിട്ടും നമ്മുടെ കൂട്ടത്തില്‍ ചിലരുണ്ട് മുത്ത്‌ നബിയുടെ വില മനസ്സിലാക്കാത്തവര്‍…., റബിഉല്‍ അവ്വല്‍ മാസം ആഗതമാകുമ്പോള്‍ അവര്‍ക്ക് നെഞ്ചിടിപ്പ് കൂടുന്നു..! വായ്‌ തുറക്കുമ്പോള്‍ പരിഹാസം ചൊരിയുന്നവര്‍, പ്രവാചക ശ്രേഷ്ടരെ ആക്ഷേപിക്കാനായി തൂലിക ചലിപ്പിക്കുന്നവര്‍, അവിടത്തെ പൊന്നുപ്പയേയും പൊന്നുമ്മയേയും കുടുംബത്തെയും കുടുംബ പരമ്പരയില്‍പെട്ട സെയ്യിദന്മാരെയും പരിഹസിക്കാനും അവഹേളിക്കാനും സമയം കണ്ടെത്തുന്നവര്‍, ഇന്നവര്‍ അനുഭവിക്കുകയാണ്, അള്ളാഹു അവരെ സമൂഹത്തിന് മുമ്പില്‍ പരിഹാസരാക്കി, പരസ്പരം ശിര്‍ക്കാരോപിച്ചു തമ്മില്‍ കലഹിക്കുന്ന കാഴ്ച. ഇത്തരം നവീന വാദികളുടെ ശര്‍റില്‍ നിന്നും റബ്ബിനോട് കാവല്‍ തേടുക. അള്ളാഹു നമ്മുടെ ജീവിതവും മരണവും സുന്നത്ത്‌ ജമാഅത്തിന്‍റെ മര്ഗ്ഗത്തിലാക്കി തരട്ടെ (ആമീന്‍ )

‘ലോകര്‍ക്ക് മുഴുവന്‍ കാരുണ്യമായി’ അയക്കപ്പെട്ടിട്ടുള്ള പുണ്യ പ്രവാചകനെക്കാളും വലിയ എന്തനുഗ്രഹമാണ് നമുക്ക്..? എവിടേയും അരാചകത്വവും അധാര്‍മ്മികതയും നടമാടുന്ന ഇക്കാലത്ത് മദ്യത്തിനെതിരെ, ചൂതാട്ടത്തിനെതിരെ, കൊലക്കും കൊള്ളക്കുമെതിരില്‍, വ്യഭിചാരത്തിനെതിരില്‍, അനീതിക്കെതിരില്‍ പ്രവാചക (സ) കാഴ്ചവെച്ച പ്രായോഗികമായ ധാര്‍മ്മിക വിപ്ലവത്തിനു വേണ്ടി ഇന്നത്തെ ലോകം ദാഹിക്കുകയാണ്.

സ്വലാത്തുകള്‍ വര്‍ദ്ധിപ്പിച്ചും അവിടെത്തെ മദ്ഹു ഗീതങ്ങള്‍ ആലപിച്ചും അവിടെത്തെ സന്ദേശങ്ങള്‍ പ്രചരിപ്പിച്ചും….നമ്മുക്കും വരവേല്‍ക്കാം ആ പുണ്യ റബീഉല്‍ അവ്വല്‍ മാസത്തെ..! നാഥന്‍ തുണക്കട്ടെ (ആമീന്‍ )

സുന്നി സഹോദരങ്ങളോട്…….!


 പ്രിയ സഹോദരന്മാരേ, السلام عليكم ورحمة الله وبركاته,

പണ്ഡിതന്മാരെയും സാദാത്തുക്കളെയും തെറിയഭിഷേകം ചെയ്തുകൊണ്ട് സോഷ്യല്‍ നെറ്റ്‌വര്‍ക്കുകള്‍ മലീമസമായിക്കൊണ്ടിരിക്കുന്നു. താന്‍ എഴുതുന്നതും ‘ലൈക്’ ചെയ്യുന്നതും ഫോര്‍വേഡ് ചെയ്യുന്നതുമൊക്കെ പാപ മാണെന്നറിയാത്തവരല്ല ഇതു ചെയ്യുന്നത്. വിവരമില്ലാത്തവര്‍ (വിവരമുള്ളവരും പിറകിലല്ല) എന്തെങ്കിലും പോസ്റ്റുചെയ്താല്‍ അത് തന്‍റെ എതിര്‍ ഗ്രൂപിനെതിരെയാണല്ലോ എങ്കില്‍ കിടക്കട്ടെ എന്‍റെ ഒരു ലൈക്‌. പിന്നെ അത് ഫോര്‍വേഡായി, കമ്മന്റായി, കൈമാറി കൈമാറി അതിശീഘ്രം പരക്കുകയായി. ആ വാര്‍ത്തയുടെ നിജസ്ഥിതി അറിയാനോ ആ വാര്‍ത്ത നമ്മുടെ സമുദായത്തില്‍ ഉണ്ടാക്കാവുന്ന പ്രത്യാഘാതങ്ങളെ കുറിച്ച് ചിന്തിക്കുവാനോ നാം തയ്യാറല്ല. 

നാം എല്ലാവരും മനസ്സിലാക്കേണ്ടുന്ന ഒരു സത്യമാണ് സംഘടനകളെന്നത് സുന്നത്ത് ജമാ‌അത്ത് എന്ന ആദര്‍ശപ്രസ്ഥാനത്തിന്റെ വേലിക്കെട്ടുകളാണെന്ന്. കേരളത്തില്‍ സുന്നത്ത് ജമാ‌അത്തിനെ സംരക്ഷിക്കാനുള്ള പല സംഘടനകളുമുണ്ട്. അവയെ തള്ളിപ്പറയാനോ അതിന്റെ ബഹുമാന്യരായ പണ്ഡിതന്മാരെയോ നേതാക്കളേയോ വ്യക്തിഹത്യ ചെയ്യാനോ ആക്ഷേപിക്കാനോ ഒരു സുന്നിക്ക് പാടില്ല. സംഘടനയും ആദര്‍ശവും രണ്ടും ഒന്നല്ല , ആദര്‍ശം എന്നു പറയുന്നത് സുന്നത് ജമാ‌അത്താണ്. അത് നമ്മുടെ വിശ്വാസവും പ്രമാണവുമാണ്. അതില്‍ ഒരു തരത്തിലുള്ള വിട്ടുവീഴ്ചയും സ്വീകാര്യമല്ല. അതില്‍ വരുന്ന വ്യത്യാസമാണ് ഒരാളെ മുബ്‌തദി‌ഉം സുന്നിയുമായി വേര്‍തിരിക്കുന്നത്. ഈ വിശ്വാസ പ്രസ്ഥാനത്തെ സംരക്ഷിക്കാന്‍  വേണ്ടി  കാലാ കാലങ്ങളിലായി സൌകര്യാര്‍ത്ഥമായി ഉണ്ടാക്കുന്ന സംവിധാനത്തെയാണ് സംഘടന എന്നു പറയുന്നത്. അപ്പോള്‍ പ്രസ്ഥാനമെന്നത് നമ്മുടെ മൂലധനമാണ്. അതാണ് ദുന്‍‌യാവിലും ആഖിറത്തിലും നമ്മെ രക്ഷിക്കുന്നതും വിജയിപ്പിക്കുന്നതും. അതു നമ്മുടെ ദീനാണ്. നമ്മുടെ ഈമാനുമാണ്. അതിനെ കൊള്ളയടിക്കാന്‍ വേണ്ടി നവീന വാദികളും നിരീശ്വരവാദികളും കള്ളത്ത്വരീഖത്തുകളും ഉടലെടുക്കുമ്പോൾ അവരിൽ നിന്ന് ഈ വിശ്വാസപ്രമാണത്തെ സംരക്ഷിക്കാനുള്ള സംഘടിത ശ്രമമാണ് സംഘടനകൾ ചെയ്തുകൊണ്ടിരിക്കുന്നത്. ബഹുമാനപ്പെട്ട സമസ്ത എന്ന സംഘടന തന്നെ ഉല്‍ഭവിച്ചിട്ട് നൂറില്‍ താഴെ വര്‍ഷമേ ആയിട്ടുള്ളൂ. അതിനു മുമ്പും സുന്നത്ത് ജമാ‌അത്തുണ്ടല്ലോ? സുന്നത്ത് ജമാ‌അത്തിന്റെ വിശ്വാസപ്രമാണത്തെ കടന്നാക്രമിക്കാന്‍ നവീനവാദികൾ ഒരുമ്പെടുമ്പോള്‍ അതിനെ സംരക്ഷിക്കാനായി  ഒരോ കാലത്തെയും സുന്നികൾ വിവിധ സംവിധാനങ്ങൾ ആവിഷ്കരിച്ച് പ്രവര്‍ത്തിച്ചിട്ടുണ്ട്. അത്തരം ഒരു കാലിക സംവിധാനമാണ്  സുന്നി സംഘടനകളെല്ലാം. ഓരോരുത്തര്‍ക്കും ഇഷ്ടമുള്ളതിൽ മെമ്പറായി പ്രവര്‍ത്തിക്കാം. പക്ഷെ ഒരിക്കലും മറ്റുള്ള സുന്നീ സംഘടനകളേയോ അവരുടെ നേതാക്കളേയോ പണ്ഡിതരെയോ ആക്ഷേപിക്കാന്‍ പാടില്ല. നാം ഷാഫി‌ഇകളാണെന്ന് കരുതി ഇമാം അബൂഹനീഫയെ എതിര്‍ക്കാന്‍ പറ്റുമോ? ഒരു ഹനഫിക്ക് ഇമാം മാലികിനെ ആക്ഷേപിക്കാന്‍ പറ്റുമോ? ഒരിക്കലും പാടില്ല. അവരെ അംഗീകരിക്കുന്നതുകൊണ്ടോ ആക്ഷേപിക്കുന്നില്ലെന്നതു കൊണ്ടോ നാം ആ മദ്‌ഹബ്കാരാണെന്നും വരില്ല. മറ്റുള്ളവരെ ആദരിക്കുകയും ബഹുമാനിക്കുകയും അംഗീകരിക്കുകയും ചെയ്യുന്നതോടെ നമുക്കിഷ്ടമുള്ള മദ്‌ഹബ് സ്വീകരിക്കാവുന്നതാണ്. ഇതു പോലെത്തന്നെയാണ് ഇന്നത്തെ സുന്നീ സംഘടനകളേയും അതിന്റെ നേതാക്കളേയും പണ്ഡിതരേയും നാം കാണേണ്ടത്.

നമുക്കിഷ്ടമുള്ളതിൽ അംഗമാകാം. അതോടൊപ്പം മറ്റു സുന്നീ സംഘടകളേയും നേതാക്കളേയും അണികളേയും ആദരിക്കാനും ആക്ഷേപിക്കാതിരിക്കാനുമുള്ള വിശാല മനസ്കത നമുക്കുണ്ടാവണം. നാം ആദര്‍ശ സഹോദരങ്ങളാവണം. ഒരിക്കലും മാന്യതക്കും പരിശുദ്ധ ഇസ്‌ലാമിന്റെ സംസ്കാരത്തിനും യോജിക്കാത്ത  ആരോപണങ്ങളും ശകാരങ്ങളും തെറിയഭിഷേകങ്ങളും നമ്മിൽ നിന്ന് ഉണ്ടായിക്കൂടാ.  മദ്‌ഹബിന്റെ ഇമാമീങ്ങളിൽ പ്രബലരാണ് ഇമാം ശാഫിയും ഇമാം അബൂ ഹനീഫയും   رضي الله عنهما  ഇതില്‍ ഇമാം അബൂ ഹനീഫ رحمه اللهനെ ക്കുറിച്ച് ചരിത്രമെഴുതിയവരിൽ പ്രധാനിയാണ് ഇമാം ഇബ്നു ഹജറുല്‍ ഹൈതമി رحمه الله തന്റെ ആ വിഷയത്തിലെ പ്രസിദ്ധ കിതാബാണ് [الخيرات الحسان في مناقب أبي حنيفة النعمان   എന്ന കിതാബ്. ഷാഫി‌ഈ മദ്‌ഹബുകാരനായ ഇമാം നവവി  رحمه الله നെ പുകഴ്ത്തുകയും അവരുടെ കിതാബുകളെ അംഗീകരിക്കുകയും ചെയ്യാത്ത മറ്റ് മദ്‌ഹബുകളില്ല. ഇതായിരുന്നു നമ്മുടെ മുന്‍‌ഗാമികളുടെ സംസ്കാരം. പക്ഷെ നാമിന്ന് രാഷ്ട്രീയ സംഘടനകളെപ്പോലും കവച്ചുവെക്കുന്ന രീതിയിൽ തരംതാണ് എതിരാളികളെ ഒതുക്കാന്‍ വേണ്ടി ഏത് നീചവേലയും ചെയ്യാന്‍ തയ്യാറാകുന്നതിന്റെ ഉദാഹരണങ്ങളാണ് ഇന്ന് സോഷ്യല്‍ മീഡിയകളില്‍ പ്രചരിക്കുന്ന എഡിറ്റിംഗ് ഫോട്ടോകളും ക്ലിപ്പുകളും വാര്‍ത്തകളും.  

ഇമാം അഹ്‌മദുല്‍ ഹദ്ദാദ് رحمه الله  പറയുന്നത് നോക്കൂ:

وَاعْلَمْ أَنَّ كَثِيرَ مَّا يُخْتَمُ بِالسُّوءِ لِلَّذِينَ يَتَهَاوَنُونَ بِالصَّلَاةِ الْمَفْرُوضَةِ وَالزَّكَاةِ الْوَاجِبَةِ ، وَالَّذِينَ يَتَتَبَّعُونَ عَوْرَاتِ الْمُسْلِمِينَ ، وَالَّذِينَ يُنْقِصُونَ الْمِكْيَالَ وَالْمِيزَانَ ، وَالَّذِينَ يَخْدَعُونَ الْمُسْلِمِينَ وَيَغُضُّونَهُمْ وَيُلَبِّسُونَ عَلَيْهِمْ فِي أُمُورِ دِينِهِمْ. (مفتاح الجنة للإمام السيد أحمد مشهور طه الحداد رحمه الله صفحة: 91) .

“നീ മനസ്സിലാക്കുക, കൂടുതലും സൂ‌ഉൽ ഖാതിമത്തിൽ പെട്ടുപോകുന്നവൽ (കാഫിറായി ചത്തു പോകുന്നവര്‍) നിര്‍ബന്ധ നിസ്കാരങ്ങളെയും സകാത്തിനേയും നിസ്സാരമായി കാണുന്നവരാണ്. മുസ്‌ലിമീങ്ങളുടെ രഹസ്യങ്ങളും പോരായ്മകളും ചികഞ്ഞന്വേഷിക്കാന്‍ നടക്കുന്നവരുമാണ്. അളവിലും തൂക്കത്തിലും കുറവ് വരുത്തുന്നവരും”. (ഇമാം അഹ്‌മദുല്‍ ഹദ്ദാദ് [ رحمه الله ന്റെ മിഫ്താഹുല്‍ ജന്ന, പേജ് 91)

മുസ്‌ലിമീങ്ങളുടെ ന്യൂനതകൾ പ്രചരിപ്പിക്കൽ ഇന്ന് ഒരു രോഗമായി മാറിയിരിക്കുകയാണ്. അത് അവസാനം ഈമാന്‍ കിട്ടാതെ മരിക്കാന്‍ കാരണമാകുമെങ്കിൽ കാര്യത്തിന്റെ ഗൌരവം നാം ആലോചിക്കുക. അല്ലാഹു നമ്മേയും മാതാപിതാക്കളേയും ഭാര്യമക്കളേയും ഹുസ്‌നുൽ ഖാതിമത്തു കൊണ്ട് അനുഗ്രഹിക്കട്ടെ. പണ്ഡിതന്മാരേയും സാദാത്തുക്കളേയും സാധാരണക്കാരെയും ആദരിക്കുന്നവരിൽ അല്ലാഹു നമ്മെ ഉള്‍പ്പെടുത്തട്ടെ.(ആമീന്‍)

By Muslim Ummath Posted in Islamic
Muharamfast

താസൂആഅ്, ആശുറാഅ് (മുഹറം 9,10)


വ്രതാനുഷ്ടാനമാണ്   ആശുറാഅ്  ദിനത്തില്‍ പ്രത്യേകം കല്‍പ്പിക്കപ്പെട്ട പ്രഥമ  കാര്യം അംര്‍  ഇബ്നുല്‍ ആസ്വി (റ) യില്‍ നിന്ന് അബു മൂസാ  അല്  മദീനി  (റ) ഉദ്ദരിച്ചു  ഹദീസില്‍ നബി (സ)  പറയുന്നു. “ആശുറാഇന്റെ നോമ്പ് ഒരു വര്‍ഷത്തെ നോമ്പിനു തുല്യമാണ് ” (ഇര്‍ഷാദ്:76, അജ് വിബ: 50,51). ആശുറാഅ് ദിനത്തിലെ സ്വദഖ:, ഒരു വര്‍ഷത്തെ സ്വദഖ:കള്‍ക്ക്  തുല്യമാണെന്നും   മേല്‍ പറഞ്ഞ ഹദീസിന്റെ അവസാന ഭാഗത്തുണ്ട് .

മുഹറം ഒമ്പത്, പത്ത് ദിവസങ്ങളെ യഥാക്രമം  താസൂആഅ്ആശുറാഅ് എന്നിങ്ങനെ വിളിക്കുന്നു, മുഹറം ഒമ്പത്, പത്ത്  ദിവസങ്ങളിലെ നോമ്പ് പ്രബലമായ സുന്നത്താണ്. ആശുറാഅ് നബി (സ) തങ്ങള്‍ അനുഷ്ടിക്കുകയും താസൂആഅ്അനുഷ്ടിക്കാന്‍ പ്രോത്സാഹിപ്പിക്കുകയും ചെയ്തിട്ടുണ്ട്.

ആശുറാഅ് ദിവസം (മുഹറം 10)

ആശുറാഅ് നോമ്പിനു വിവിധ പദവികളുണ്ടെന്നു  പണ്ഡിത ലോകം വിവരിക്കുന്നു  മുഹറം 9, 10, 11 എന്നീ  മൂന്നു ദിവസങ്ങളില്‍ നോമ്പ്  നോല്‍ക്കലാണ് ഒന്നാം പദവി, ഒമ്പതും പത്തും  മാത്രം നോമ്പ്  എടുക്കല്‍ രണ്ടാമതും, പത്തുമാത്രം നോല്‍ക്കല്‍  മൂന്നാമതും  നില്‍ക്കുന്നു (ഫിഖഹുസ്സുന്ന:1/518)

താസൂആഅ് ദിവസം (മുഹറം 9)

ഒമ്പതിന്  നോമ്പനുഷ്ടിക്കാത്തവര്‍ക്കും അനുഷ്ടിച്ചവര്‍ക്കും പത്തിനോടൊപ്പം പതിനൊന്നിന്  നോമ്പ് എടുക്കല്‍ സുന്നത്തുണ്ട്‌ (തുഹ്ഫ: & ശര്‍വാനി : 3/456, നിഹായ:3/201, ഫതഹുല്‍ മുഈന്‍::; 203, ശര്‍ഹു ബാഫളെല്; 2/199). പത്തിനോടൊപ്പം ഒമ്പതോ പതിനൊന്നോ, ഏതെങ്കിലും ഒന്നുമാത്രം അനുഷ്ടിക്കുന്നവര്‍ക്ക്  ഒമ്പതാണുത്തമം, കാരണം ജുതരോട്  എതിരാകാന്‍ വേണ്ടിയുള്ള ആശുറാഇന്റെ അനുബന്ധമെന്നതിനു പുറമെ, മുഹറം മാസത്തിലെ ആദ്യത്തെ  പത്തു ദിവസങ്ങള്‍ക്കുള്ള പ്രത്യേക ശ്രേഷ്ടതയിലും ഒമ്പത്  ഉള്‍പെടുന്നുണ്ട് .

ആശുറാഅ് ദിവസം (മുഹറം 10) കുടുംബബന്ധങ്ങള്‍ ചേര്‍ക്കുന്നതിന് വലിയ പ്രാധാന്യമുണ്ട്. ആശുറാഅ് ദിവസം ആശ്രിതര്‍ക്ക് വിശാലത ചെയ്താല്‍ അവന് വര്‍ഷം മുഴുവന്‍ അല്ലാഹു ഐശ്വര്യം നല്‍കുമെന്ന് നബിതങ്ങള്‍ പറഞ്ഞിട്ടുണ്ട്. (ത്വബറാനി, ബൈഹഖി). ഇത് നിരവധി വര്‍ഷങ്ങള്‍ പരീക്ഷിച്ച് ഞങ്ങള്‍ക്ക് അനുഭവപ്പെട്ടിട്ടുണെ്ടന്ന് സുഫ്‌യാനുബ്‌നു ഉയൈന (റ) വിനെ പോലുള്ള മഹാന്‍മാര്‍ പറയുന്നുണ്ട്.

وصلي الله وسلم على عبده ورسوله نبينا محمد وعلى آليه وأصحابة وأتباعه

new-hijra1435

വരവായി ഒരു പുതു വര്ഷം കൂടി…!


വരവായി  ഒരു പുതു വര്ഷം കൂടി

ഒരു പുതു വര്ഷം കൂടി നമ്മളിലേക്ക് കടന്നു വരികയാണ്, ഓരോ ഹിജ്‌റ വര്‍ഷ പിറവിയും വിശ്വാസികളുടെ മനസ്സില്‍ കുളിരും അര്‍പ്പണ ബോധവുമുണ്ടാക്കുന്നു. മുസ്ലിംകളുടെ ആരാധന, ആചാര അനുഷ്ടാനങ്ങള്‍, ആഘോഷങ്ങള്‍ എല്ലാം ഹിജ്‌റ വര്‍ഷവുമായി ബന്ധപ്പെട്ട്‌ കിടക്കുന്നു. അതിനാല്‍ മറ്റ്‌ എല്ലാ വര്‍ഷങ്ങളിലെക്കാളും പ്രാധാന്യം ഹിജ്‌റ വര്‍ഷ പിറവിക്ക്‌ തന്നെ. അറഫയില്‍ വെച്ചു നടന്ന നബി (സ) തങ്ങളുടെ വിശ്വപ്രസിദ്ധമായ വിടവാങ്ങല്‍ പ്രസംഗത്തില്‍ അവിടുന്ന് പറഞ്ഞു: ആകാശ ഭൂമികളുടെ സൃഷ്ടിപ്പ്ദിനം മുതല്‍ കാലം പന്ത്രണ്ട് മാസങ്ങളായി ചാക്രികമായി ചലിച്ചുകൊണ്ടേയിരിക്കുന്നു. അതില്‍ നാലു മാസങ്ങള്‍ വിശുദ്ധമാണ്. ദുല്‍ഖഅദ്, ദുല്‍ഹിജ്ജ, മുഹറം എന്നീ തുടര്‍ന്നുവരുന്ന മാസങ്ങളും റബജുമാണവ. വിശുദ്ധ ഖുര്‍ആനില്‍ സൂറത്തുത്തൗബയിലെ മുപ്പത്തിആറാം സൂക്തത്തിലും ഇതേ കാര്യം പ്രതിപാദിക്കുന്നുണ്ട്.

എന്ത് കൊണ്ട്  ‘ഹിജറ’യെ തെരഞ്ഞെടുത്തു?

ഇസ്‌ലാമിലെ ആരാധനകളും കാലഗണനകളുമെല്ലാം ചന്ദ്രമാസത്തെ ആസ്പദമാക്കിയുള്ള ഹിജ്‌റകലണ്ടര്‍ അനുസരിച്ചാണ് നടക്കുന്നത്.     ഖലീഫ ഉമ(റ) ഭരണം നടത്തുന്ന കാലത്ത് രണ്ട് വ്യക്തികള്‍ തമ്മിലുള്ള സാമ്പത്തിക ഇടപാടിലെ അവധി സംബന്ധമായ തര്‍ക്കം ഖലീഫയുടെ മുന്നിലെത്തി. അപ്പോഴാണ് ഒരു നിര്‍ണിതമായ കാലഗണനയുടെ ആവശ്യകതയെക്കുറിച്ച് ഖലീഫ ചിന്തിച്ചത്. അതിനു മുമ്പ് നബി തങ്ങളുടെ ജനനവര്‍ഷം നടന്ന ആനക്കലഹ സംഭവത്തെ ആസ്പദമാക്കിയും അറേബ്യന്‍ ഗോത്രവര്‍ഗങ്ങള്‍ തമ്മില്‍ നടന്ന രക്തരൂക്ഷിതമായ ഫിജാര്‍ യുദ്ധത്തെ ആസ്പദമാക്കിയും അനൗദ്യോഗിക കാലഗണനകള്‍ അറബികള്‍ക്കിടയില്‍ നിലനിന്നിരുന്നു. യമനിലെ രാജാവായിരുന്ന അബ്‌റഹത്ത് നിരവധി ആനകളോടു കൂടി മക്കയിലെ കഅബ പൊളിക്കാന്‍ വരികയും അല്ലാഹു അവരെ അബാബീല്‍ പക്ഷികളെ ഉപയോഗിച്ച് നശിപ്പിക്കുകയും ചെയ്ത സംഭവമാണ് ആനക്കലഹം. ഇത് കഴിഞ്ഞ് അമ്പത് ദിവസങ്ങള്‍ക്കു ശേഷമാണ് നബി തങ്ങള്‍ ജനിക്കുന്നത്. ഇതുമുതല്‍ എണ്ണുന്ന വര്‍ഷത്തെ ഗജവത്സരം (ആമുല്‍ ഫീല്‍) എന്നാണ് വിളിച്ചിരുന്നത്. എന്നാല്‍ അവയൊന്നും വ്യാപകമായ ജനാംഗീകാരം നേടിയിരുന്നില്ല.

മേല്‍ കാര്യം ചര്‍ച്ച ചെയ്യാന്‍ ഖലീഫ വിളിച്ചുചേര്‍ത്ത സ്വഹാബീ പ്രമുഖരുടെ കൂടിയാലോചനാ യോഗത്തിലാണ് ഹിജ്‌റ വര്‍ഷത്തിന് തുടക്കമായത്. നബിജീവിതത്തിലെ ജനനം, പ്രവാചകലബ്ധി, ഹിജ്‌റ, വഫാത്ത് തുടങ്ങി നിരവധി കാര്യങ്ങള്‍ അവലംബിക്കുവാന്‍ ചര്‍ച്ചകള്‍ വന്നെങ്കിലും നബിജീവിതത്തിലെ ഏറ്റവും സുപ്രധാന സംഭവവും ഇസ്‌ലാമിക പ്രബോധന പ്രചാരണരംഗത്ത് ഒരു വഴിത്തിരിവുമായ ഹിജ്‌റ തന്നെയാണ് അനുസ്മരിക്കാന്‍ ഏറ്റവും അഭികാമ്യമെന്ന നിലയിലാണ് അവര്‍ ഏകോപിതരായി ഹിജ്‌റയെ തിരഞ്ഞെടുത്തത്.

നബി(സ)യും സ്വഹാബത്തും മക്കയില്‍ നിന്ന്‌ മദീനയിലേക്ക്‌ നടത്തിയ പാലായനത്തെ അനുസ്മരിപ്പിക്കുകയാണ് ഓരോ ഹിജ്‌റ വര്‍ഷവും. ഇസ്ലാമിക ചരിത്രത്തില്‍ വിശിഷ്യാ പ്രവാചകര്‍ (സ)യുടെ ജീവിത യാത്രയില്‍ ഒരു നാഴിക ക്കല്ലാണ്‌ ഹിജ്‌റ. ഇസ്ലാമിക പ്രബോധന പ്രവര്‍ത്തന രംഗത്തുണ്ടായ ഒരു വഴിത്തിരിവു കൂടിയാണ്‌ ഹിജ്‌റ. ജനിച്ച്‌ വളര്‍ന്ന മക്കയോട്‌ യാത്ര പറഞ്ഞ്‌ നബി(സ)യും സ്വഹാബത്തും 400 കിലോമീറ്റര്‍ അകലെയുള്ള യസ്‌രിബ്‌ (ഇന്നത്തെ മദീന) തിരഞ്ഞെടുത്തു. ഹിജ്‌റ ഒരു ഒളിച്ചോട്ട മല്ലായിരുന്നു. പ്രത്യുത അല്ലാഹുവിന്റെ കല്‍പനയായിരുന്നു. അങ്ങിനെ ഒരു പ്രവാസ ജീവിതത്തിന്റെ തുടക്കം കുറിക്കലായിരുന്നു ഹിജ്‌റ. സ്വന്തം നാടും വീടും ഉപേക്ഷിച്ച്‌ അന്യ നാട്ടിനെ സ്വീകരിക്കു മ്പോഴുണ്ടാവുന്ന മനോവേദനയും പ്രയാസവും ആര്‍ക്കും അസഹ്യമായിരിക്കും. അല്ലാഹുവിനോടുള്ള അനുസരണക്കും ഇസ്ലാമിക പുരോഗതിക്കും, വളര്‍ച്ചക്കും മുമ്പില്‍ എല്ലാം ക്ഷമിക്കുകയും സഹിക്കുക യുമായിരുന്നു നബിയും സ്വഹാബത്തും.

ഹിജ്‌റ വര്‍ഷത്തിലെ പ്രഥമ മാസമാണ് മുഹറം. പുതുവര്‍ഷാരംഭം അമിതമായ ആഹ്‌ളാദപ്രകടനത്തിനല്ല നാം ഉപയോഗിക്കേണ്ടത്. മറിച്ച് മുന്‍വര്‍ഷങ്ങളിലെ ജയപരാജയങ്ങള്‍ വിലയിരുത്തുകയും അതിനെ ചവിട്ടുപടിയായി കണ്ട് വരുംവര്‍ഷത്തില്‍ വിജയത്തിലേക്ക് മുന്നേറുകയുമാണ് നാം ചെയ്യേണ്ടത്.

മുഹറം  മാസത്തിലെ പ്രാധാന്യം 

നിരവധി ചരിത്ര സംഭവങ്ങള്‍ക്ക് സാക്ഷിയാണ് മുഹറം മാസത്തിലെ പത്താം ദിവസം. ആദം (അ) സൃഷ്ടിക്കപ്പെട്ടതും സ്വര്‍ഗപ്രവേശിതനായതും ഈ ദിനത്തിലാണ്. ദൈവിക സിംഹാസനമായ അര്‍ശും ആകാശഭൂമികളും സൂര്യചന്ദ്രാദികളും സൃഷ്ടിക്കപ്പെട്ടതും ഈ ദിനത്തില്‍ തന്നെയാണ്. ഇബ്‌റാഹിം നബിയുടെയും ഈസാ നബിയുടെയും ജന്മദിനം മുഹറം 10 നു തന്നെ. നൂഹ് നബിയുടെ കപ്പല്‍ ഇടിച്ച് പര്‍വ്വതത്തില്‍ നങ്കൂരമിട്ടതും ദൈവമാണെന്ന് വാദിച്ച് ഈജിപ്തിലെ ഫറോവ ചക്രവര്‍ത്തി ചെങ്കടലില്‍ മുങ്ങിമരിച്ചതും മൂസാ നബിയും അനുനായികളും ഫറോവ യുടെ ആക്രമണത്തില്‍ നിന്ന് ചെങ്കടല്‍ മുറിച്ചുകടന്ന് രക്ഷപ്പെട്ടതും ഈസാ നബിയും ഇദ്‌രരീസ് നബിയും ആകാശാരോഹണം നടത്തിയതും സുലൈമാന്‍ നബിക്ക് രാജാധികാരം ലഭിച്ചതും യഅ്ഖൂബ് നബിക്കും അയ്യൂബ് നബിക്കും പൂര്‍ണാരോഗ്യം തിരിച്ചുകിട്ടിയതും യൂസുഫ് നബി കിണറില്‍ നിന്ന് രക്ഷപ്പെട്ടതും ഭമിയില്‍ ആദ്യത്തെ മഴ ലഭിച്ചതും അന്നുതന്നെയാണ്.

മുഹറം മാസത്തിലെ പ്രധാന സംഭവങ്ങള്‍

ഇങ്ങിനെ അല്ലാഹുവിന്റെ ഇഷ്ടദാസന്‍മാര്‍ക്ക് നിരവധി ജയങ്ങളും ധിക്കാരികള്‍ക്ക് കടുത്ത ശിക്ഷയും ലഭിച്ച, അല്ലാഹുവിന്റെ പ്രധാന സൃഷ്ടിപ്പുകളൊക്കെ നടന്ന ഒരു വിശുദ്ധ ദിനമാണ് മുഹറം പത്ത്. അതുകൊണ്ടുതന്നെ മുസ്‌ലിം ലോകം ഈ ദിനത്തെ ആദരപൂര്‍വം വരവേല്‍ക്കുകയും നിരവധി അനുഷ്ഠാനകര്‍മ്മങ്ങളാല്‍ ധന്യമാക്കുകയും ചെയ്യുന്നു.

താസൂആഅ്ആശുറാഅ്

നബിതങ്ങള്‍ മക്കയില്‍നിന്ന് മദീനയിലേക്ക് വന്നപ്പോള്‍ അവിടുത്തെ ജൂതന്മാര്‍ മുഹറം പത്തിന് നോമ്പനുഷ്ഠിക്കുന്നതായി ശ്രദ്ധയില്‍ പെട്ടു. അതിന്നവര്‍ കാരണം പറഞ്ഞത് മൂസാനബിയും ഇസ്രായീല്യരും ഫറോവയുടെ ആക്രമണത്തില്‍നിന്ന് രക്ഷപ്പെടുകയും ഫറോവയും അനുയായികളും നശിക്കുകയും ചെയ്ത ദിനമാണെന്നാണ്. അപ്പോള്‍ നബി തങ്ങള്‍ പറഞ്ഞു: മൂസാനബിയുടെ വിജയത്തില്‍ സന്തോഷിക്കാന്‍ ഏറ്റവും അര്‍ഹര്‍ നമ്മളാണല്ലോ?

അന്ന് നബിതങ്ങള്‍ നോമ്പനുഷ്ഠിക്കുകയും അതിനു കല്‍പിക്കുകയും ചെയ്തു. പിന്നീടൊരിക്കല്‍ നബിതങ്ങള്‍ പറഞ്ഞു: അടുത്ത വര്‍ഷം ഞാന്‍ ജീവിച്ചിരിക്കുകയാണെങ്കില്‍ മുഹറം ഒമ്പതിനുകൂടി നോമ്പനുഷ്ഠിക്കും. പക്ഷെ അന്നേക്ക് നബിതങ്ങള്‍ ജീവിച്ചിരുന്നില്ല. ഈ ഒമ്പത്, പത്ത് ദിവസങ്ങളെ യഥാക്രമം താസൂആഅ്, ആശുറാഅ് എന്നിങ്ങനെ വിളിക്കുന്നു. ഈ രണ്ടു ദിനങ്ങളിലെയും നോമ്പ് വളരെ പ്രബലമായസുന്നത്താണ്. മുഹറം ഒന്നുമുതല്‍ പത്തുവരെയും നോമ്പ് സുന്നത്തുണ്ട്.

ആശുറാഅ് ദിവസം (മുഹറം 10) കുടുംബബന്ധങ്ങള്‍ ചേര്‍ക്കുന്നതിന് വലിയ പ്രാധാന്യമുണ്ട്. ആശുറാഅ് ദിവസം ആശ്രിതര്‍ക്ക് വിശാലത ചെയ്താല്‍ അവന് വര്‍ഷം മുഴുവന്‍ അല്ലാഹു ഐശ്വര്യം നല്‍കുമെന്ന് നബിതങ്ങള്‍ പറഞ്ഞിട്ടുണ്ട്. (ത്വബറാനി, ബൈഹഖി). ഇത് നിരവധി വര്‍ഷങ്ങള്‍ പരീക്ഷിച്ച് ഞങ്ങള്‍ക്ക് അനുഭവപ്പെട്ടിട്ടുണെ്ടന്ന് സുഫ്‌യാനുബ്‌നു ഉയൈന (റ) വിനെ പോലുള്ള മഹാന്‍മാര്‍ പറയുന്നുണ്ട്

ഹിജ്‌റ നമുക്ക്‌ ധാരാളം പാഠങ്ങള്‍ നല്‍കുന്നു. സമൂഹത്തിന്റെ സുരക്ഷിതത്വവും സമാധാന സംരക്ഷണവുമാണ്‌ ഏറ്റവും പ്രധാനം. ഇസ്ലാമിന്റെ നിലനില്‍പ്പും വിശ്വാസികളുടെ ജീവിത സുരക്ഷിത ത്വവുമാണ്‌ മറ്റൊന്ന്. മത പ്രബോധനവും ആദര്‍ശ പ്രചാരവും ഏത്‌ പ്രതിസന്ധി ഘട്ടത്തിലും കയ്യൊഴി യരുതെന്നും, അതും സമാധാന പൂര്‍ണ്ണമായിരിക്കണമെന്നതും ഹിജ്‌റ നല്‍കുന്ന പാഠമാണ്‌. ഭീകരതയും, തീവ്രവാദവും വളര്‍ത്തി നാട്ടില്‍ പ്രക്ഷുബ്ദത സൃഷ്ടിക്കുന്നതിനെതിരെ താക്കിതാണ്‌ ഹിജ്‌റ നല്‍കുന്ന സന്ദേശം. ദൃഢ വിശ്വാസം, ക്ഷമ, സഹനം, സാഹോദര്യം തുടങ്ങി ധാരാളം പാഠങ്ങളാണ്‌ ഹിജ്‌റ എന്ന മഹത്തായ പാലായനം നമുക്ക്‌ നല്‍കുന്നത്‌.

ഹിജ്‌റ നല്‍കുന്ന പാഠം ഉള്‍കൊണ്ട്‌ ജീവിതം ചിട്ടപ്പെടുത്താനും സാഹോദര്യവും സമാധാനവും ഊട്ടി ഉറപ്പിക്കാനും  സര്‍വ്വ ശക്തന്‍ തുണക്കട്ടെ(ആമീന്‍ ).

By Muslim Ummath Posted in Islamic