സുന്നികൾ ഐക്യത്തിന്റെ പാതയിലാണ്….!


വിടപറഞ്ഞ ഈ റബീഉൽ അവ്വൽ മാസം സുന്നി കൈരളിക്ക്  ഏറെ സന്തോഷം നൽകുന്നതാണ്. മുത്ത് നബി തങ്ങളുടെ ജന്മത്തിൽ അതിരറ്റ സന്തോഷത്തിലും ആനന്ദത്തിലും മുഴുകിയ പ്രവാചക പ്രേമികൾക്ക് സുന്നികൾ തമ്മിലുള്ള മാനസികമായ അകൽച്ച കുറയുവാൻ ഈ പുണ്യ റബീഉൽ അവ്വൽ മാസം കാരണമായത് സുന്നി കൈരളിക്ക് ഇരട്ടി സന്തോഷം നൽകുന്നതായിരുന്നു. സംഘടനാപരമായ അഭിപ്രായ വ്യത്യാസം മൂലം ഇരു സുന്നി വിഭാഗങ്ങൾ ഒരു വേദിയിൽ ഒരുമിക്കുന്നതുപോലും അസംഭവ്യമായിരുന്നിടത്ത് പണ്ഡിതന്മാർ പരസ്പരം ഒരുമിച്ച് വേദി പങ്കിടാനും പലയിടങ്ങളിൽ സംയുക്തമായി നബിദിനറാലി നടത്തുവാനും ആശംസ നേരുവാനും കഴിഞ്ഞത് ശുഭസൂചകമാണ്. ഇരു വിഭാഗത്തുള്ള പണ്ഡിതന്മാർ ഐക്യത്തിനുവേണ്ടിയുള്ള ശ്രമങ്ങൾക്ക് പച്ചക്കൊടി കാണിക്കുകയും ചർച്ചകൾക്ക് തുടക്കം കുറിക്കുകയും ചെയ്തിരിക്കുന്നു (അൽ ഹംദുലില്ലാഹ്).

സുന്നി കൈരളിയുടെ നിലക്കാത്ത ശബ്ദമായിരുന്ന, മഹാ പണ്‌ഡിത വര്യനായ ഇ.കെ. അബൂബക്കര്‍ മുസ്‌ലിയാരുടെ അന്ത്യാഭിലാഷമായിരുന്നു സമസ്തയിലെ യോജിപ്പ്. സമസ്‌തയിലുണ്ടായിരുന്ന പ്രശ്‌നങ്ങളില്‍ മരണത്തോടടുത്ത കാലങ്ങളില്‍ മഹാനവര്‍കളില്‍ അസ്വസ്ഥതയുണ്ടാക്കിയിരുന്നു. യോജിപ്പിനുള്ള സാധ്യതകളെ സംബന്ധിച്ചു ചിന്തിക്കുകയും പ്രവര്‍ത്തിച്ചു വരുകയും ചെയ്‌തു വരുമ്പോഴാണ്‌  അദ്ദേഹം നമ്മെ വിട്ടുപിരിഞ്ഞത്. പിന്നീട് അദ്ദേഹത്തിന്റെ അന്ത്യാഭിലാഷം പുലര്‍ന്നു കാണാന്‍ ആത്മാര്‍ഥമായി ആഗ്രഹിക്കുന്ന പലരും യോജിപ്പിനായി ശ്രമം നടത്തിയിരുന്നു, അതിന്‍റെ ഫലമായി ഇരു സമസ്തയും തമ്മിലുള്ള അകല്‍ച്ച കുറഞ്ഞുവരികയും ചെയ്തിരുന്നു. നിര്‍ഭാഗ്യവശാല്‍ ഐക്യത്തിന് ഘടകവിരുദ്ധമായി പിന്നീട് ചില കേന്ദ്രങ്ങളില്‍ നിന്ന് ഉടലെടുത്ത ആസുത്രിതമായ കുത്സിത ശ്രമങ്ങള്‍ക്ക് ഒരു വിഭാഗം അകപെടുകയായിരുന്നു. ഇരു സുന്നീ വിഭാഗങ്ങള്‍ തമ്മില്‍ ഐക്യപ്പെടാന്‍ ചര്‍ച്ചകള്‍ വളരെ പുരോഗമിച്ചു മുന്നോട്ട് പോയത് സുന്നി വിരോധികള്‍ക്ക് തീരെ ദഹിച്ചിരുന്നില്ല. ഐക്യ ശ്രമത്തെ ദുര്‍ബലപ്പെടുത്താനുള്ള  അവരുടെ ശ്രമം വിജയിക്കുകയായിരുന്നു.

സുന്നികൾ ഐക്യത്തിലേക്ക് അടുക്കുമ്പോൾ അതിനെ തുരങ്കം വെയ്ക്കാൻ എല്ലാ കാലത്തും ശത്രുക്കൾ അണിയറയിൽ തന്ത്രങ്ങൾ മെനയുന്നുണ്ടാകും, ഇവിടെയും വ്യത്യസ്ഥമല്ല. തിരൂര്‍ ഉണ്യാലിൽ മുസ്ലിം ലീഗ്-സി.പി.എം തമ്മിൽ നിലനിൽക്കുന്ന സംഘർഷത്തിന്റെ ഭാഗമായി ഇക്കഴിഞ്ഞ നബിദിന റാലിക്ക് നേരെ നടന്ന അക്രമത്തെ സുന്നി വിരോധികൾ ചില ഓൺലൈൻ പത്രങ്ങളെ കൂട്ടുപിടിച്ച് ഇരു വിഭാഗം സുന്നികൾ തമ്മിലുള്ള സംഘർഷമായി ആഘോഷിക്കുകയും സുന്നി വിഭാഗങ്ങളെ തമ്മിൽ പ്രകോപിക്കുവാൻ ശ്രമം നടത്തുകയും ചെയ്തിരുന്നു. എന്നാൽ അവരുടെ കുതന്ത്രങ്ങളിൽ അകപ്പെടാതെ സുന്നി കൈരളി ഒന്നിച്ച്  അത് പൊളിച്ചടക്കുകയായിരുന്നു.  കേരളത്തിൽ മുജാഹിദ് വിഭാഗം തൗഹീദിന്റെ പേരിൽ പല വിഭാഗങ്ങളായി ചിന്നഭിന്നമാകുകയും  ആഗോളതലത്തിലും കേരളത്തിലും സലഫി ഭീകരത നിറഞ്ഞാടി ലോകത്തിന് ഭീഷണിയായ സലഫി ഭീകരത രാജ്യത്ത് വിചാരണ ചെയ്യപ്പെടുന്നതിനിടയിൽ “സ്നേഹം, സൗഹാർദം, സഹോദര്യം, സഹിഷ്ണുത, സഹവർത്തിത്വം, മതമൈത്രി” ആദിയായ മൂല്യങ്ങൾക്കു വേണ്ടി സംസ്ഥാന വ്യാപകമായി കാമ്പയിനും സമ്മേളനവും നടത്തി കേരളത്തിലെ സലഫികളെ കുളിപ്പിച്ചു കയറ്റാൻ പെടാ പാട് പെടുന്ന വളരെ ദയനീയമായ അവസ്ഥയിലാണ് വഹാബികൾ. അതിനിടയിലാണ് സലഫിസത്തിന് നവോദ്ധാനത്തിന്റെ പട്ടം ചാർത്തി കരകയറ്റാൻ മുസ്ലിം ലീഗ് മുന്നിട്ടിറങ്ങിയത്. ഇത് ഭൂരിപക്ഷം വരുന്ന സുന്നീ സമൂഹത്തിന്റെ എതിർപ്പ് വിളിച്ചുവരുത്തുകയും ഇരു വിഭാഗം സുന്നികൾ സലഫി ഭീകരതക്കെതിരെ സംസ്ഥാന വ്യാപകമായി കാമ്പയിനും പ്രചാരണങ്ങളുമായി മുന്നിട്ടിറങ്ങിയിരിക്കുകയാണ്.

പരസ്പരം പഴിചാരിയുള്ള വിവാദങ്ങളില്‍ നിന്ന് ഇരു കൂട്ടരും പിന്മാറിയത് ഐക്യത്തിന് വേണ്ടി ആഗ്രഹിക്കുന്ന സുന്നി കൈരളിക്ക്‌ ഏറെ പ്രതീക്ഷയും അതിലുപരി ആവേശവും ഉണ്ടാക്കിയിട്ടുണ്ട്, എങ്കിലും ഇപ്പോഴും ചില അപസ്വരങ്ങള്‍ സോഷ്യല്‍ മീഡിയകളിൽ കൂടിയല്ലാം സുന്നികളെ തമ്മില്‍ പ്രകോപിക്കും വിധം പ്രചരിപ്പിക്കുന്നുണ്ട്, അതില്‍ ഏറെയും സുന്നികളായി ചമഞ്ഞു ശത്രുക്കള്‍ മെനയുന്ന വാര്‍ത്തകളാണ്, പഴയ വിഷയങ്ങളൊക്കെ പൊടിതട്ടി എടുത്തിട്ട് പ്രകോപനങ്ങള്‍ ഉണ്ടാക്കാന്‍ കിണഞ്ഞു ശ്രമിക്കുന്നുണ്ട്, ഇത് വഹാബി പ്രസ്ഥാനത്തില്‍ ഇപ്പോള്‍ ഉണ്ടായിരിക്കുന്ന വലിയ പ്രതിസന്ധിയില്‍ നിന്ന് ശ്രദ്ധ തിരിക്കാന്‍ അവര്‍ പടച്ചുണ്ടാക്കുന്ന സിയോണിസ്റ്റു തന്ത്രമാണ്, അത് വൈകിയാണെങ്കിലും സുന്നി പ്രവര്‍ത്തകര്‍ തിരിച്ചറിഞ്ഞിട്ടുണ്ട്.

ഐക്യം പുലര്‍ന്നു കാണാന്‍ സുന്നി കൈരളി കാത്തിരിക്കുകയാണ്, ആരുടേയും അസ്ഥിത്വം പണയം വെച്ചുകൊണ്ടുള്ള ഐക്യമല്ല, മറിച്ച് മനസുകള്‍ തമ്മില്‍ അടുക്കുന്ന, എല്ലാ അഭിപ്രായ വ്യത്യാസങ്ങളും മാറ്റിവെച്ചു സുന്നി കുടുംബങ്ങളിൽ, സുന്നി മാനസങ്ങളില്‍ സ്നേഹത്തിന്റെയും യോജിപ്പിറെയും പുതിയൊരു വാതായനം തുറന്നു കാണാന്‍ സുന്നി കൈരളി കാത്തിരിക്കുകയാണ്.

അബു അഹമദ് , മുസ്ലിം ഉമ്മത്ത്‌ – കേരള ചാപ്റ്റര്‍

 

Advertisements
By Muslim Ummath Posted in Islamic

വസന്തം വിടപറഞ്ഞെങ്കിലും….!


പ്രവാചക പ്രഭു മുഹമ്മദ് മുസ്‌തഫ (സ) യുടെ ജന്മം കൊണ്ട്‌ അനുഗ്രഹീതമായ പുണ്യ റബീഉല്‍ അവ്വല്‍ മാസം നമ്മോടു വിടപറഞ്ഞു കഴിഞ്ഞു. ഇനി അടുത്ത റബീഇനു വേണ്ടി വിശ്വാസികള്‍ കാത്തിരിക്കുകയാണ്. പക്ഷെ നമ്മളില്‍ ആരെല്ലാം അതിനു സംബന്ധിക്കാന്‍ സൗഭാഗ്യം സര്‍വ്വശക്തന്‍ കനിഞ്ഞേകുമെന്ന് ആര്‍ക്കും പറയാന്‍ കഴിയില്ല. ഇനിയും ഒരുപാട് ആ വസന്തത്തിന്റെ നറുമണം ആസ്വദിക്കാന്‍ അല്ലാഹു നമ്മുക്ക് തൗഫീഖ് ചെയ്യട്ടെ (ആമീന്‍ )

പുണ്യ റബീഇ ആഗതമാകുമ്പോള്‍ പ്രവാചക സ്നേഹികളുടെ ഹൃദയം സന്തോഷത്താല്‍ ആനന്ത ലഹരിയിലായിരുന്നു. അവിടെത്തേക്ക് സ്വലാത്തുകളും ചൊല്ലിയും തിരുനബി പ്രകീര്‍ത്തനങ്ങള്‍ ആലപിച്ചും, അവിടെത്തെ അപദാനങ്ങള്‍ വാഴ്ത്തിയും, സജീവമായിരുന്ന പുണ്യ റബീഉല്‍ അവ്വല്‍ മാസം, വല്ലാത്തൊരു ആത്മീയ അനുഭൂതിയായിരുന്നു സമ്മാനിച്ചിരുന്നത്. തിരുദൂതരോടുള്ള അടങ്ങാത്ത സ്‌നേഹത്തിന്റെയും ആത്മീയ ഔന്നിത്യത്തിന്റെയും ബഹിര്‍സ്ഫുരണമായി പ്രവാചക പ്രകീര്‍ത്തന സദസ്സുകളും ഇശ്‌ഖേ റസൂല്‍ ജത്സകളും നബിദിന ഘോഷ റാലികളും യാത്രകളുമെല്ലാമായി പ്രവാചക പ്രേമം അലയടിക്കുമ്പോള്‍ വിശ്വാസി സാഗരത്തിന്‌ ആത്മാനന്തവും ആഹ്ലാദവും സന്തോഷവുമായിരുന്നു. യാത്രചൊല്ലി വിടപറഞ്ഞ പുണ്യ റബീഇനു പ്രവാചക സ്നേഹികള്‍ കാത്തിരിക്കുകയാണ് അടുത്ത വസന്തത്തിന്‍റെ നറുമണം അനുഭവിക്കാന്‍, സര്‍വ്വ ശക്തന്‍ അതിനു തൗഫീക്ക് നല്‍കട്ടെ (ആമീന്‍)

(തുർക്കിയിൽ നടന്ന നബിദിനാഘോഷം 2017)

ആ പുണ്യ മാസം നമ്മോട് യാത്ര പറഞ്ഞെങ്കിലും പ്രവാചക പ്രഭു (സ) തങ്ങളോടുള്ള സ്നേഹാദരവിനും നമ്മുടെ മനസ്സുകളില്‍ പ്രോജ്ജ്വലിച്ച് നില്‍ക്കുന്ന പ്രവാചകാനുരാഗത്തിനും ഒരു കുറവും വന്നുകൂടാ. പ്രവാചക ചര്യകള്‍ കൂടുതല്‍ മുറുകെ പിടിച്ച്, പ്രവാചക മദ്ഹു ഗീതങ്ങള്‍ പാരായണം ചെയ്തും, വീടുകളില്‍ പരിശുദ്ധ ഖുര്‍ആന്‍ മൗലിദുകളാല്‍ മുഖരിതമാക്കിയും അവിടെത്തേക്ക് ധാരാളം സ്വലാത്തുകള്‍ വര്‍ദ്ധിപ്പിച്ചും റബ്ബിന്റെ പുണ്യം കരസ്ഥമാക്കാന്‍ ഉത്സുകരായിരിക്കണം.

(നൂറിലധികം പേർ അണിനിരന്ന ദഫ്മുട്ട് 2017)

പ്രവാചക സ്നേഹവും തിരുനാളിനോടും ജീവിത ദൌത്യത്തോടുമുള്ള ആദരവും ഏതൊരു മനുഷ്യനും എല്ലാ നന്മയും പ്രദാനംചെയ്യും. മുസ്ലിമിന്‍റെ സ്നേഹം ജഢികമല്ല. ആത്മീയമാണ്. അവന്‍ മുത്ത്‌ നബിയെ ഹൃദയം നിറഞ്ഞ് സ്നേഹിക്കുന്നു, ആ സ്നേഹം ഒരിക്കലും നിലക്കാതെ സ്വലാത്തായി, ദിക്ക്റായി മൗലിദായി, വിളിയായി ഒഴുകികൊണ്ടേയിരിക്കണം. നാഥന്‍ തുണക്കട്ടെ (ആമീന്‍ )

Celebrating Eid Milad-un-Nabi in Al-Masjid an-Nabawi 2017

 

By Muslim Ummath Posted in Islamic

വരവേല്‍ക്കാം പുണ്യ റബീഉല്‍ അവ്വല്‍ മാസത്തെ..!


വരവേല്ക്കാം് പുണ്യ റബീഉല്‍ അവ്വല്‍ മാസത്തെ..!

ഹിജ്റ പുതുവര്‍ഷത്തിന്‍റെ പ്രാരംഭ മാസം മുഹറം വിടചൊല്ലി പുണ്യ റബീഅയെ തൊട്ടുരുമ്മി നില്‍ക്കുന്ന സഫര്‍ മാസം ഏതാനും ദിനങ്ങള്‍ കഴിഞ്ഞാല്‍ നമ്മോടു വിടപറയുകയാണ്, പരിശുദ്ദ റബീഉല്‍ അവ്വല്‍ മാസത്തെ വരവേല്‍ക്കാന്‍ വിശ്വാസികള്‍ മനസാ വാചാ കര്‍മ്മണ ഒരുങ്ങി കഴിഞ്ഞു.

റബീഉല്‍ അവ്വല്‍ എന്നാല്‍ ‘വസന്തത്തിന്‍റെ ആദ്യ മാസം’ എന്നാണ്, വസന്തകാലം കടുത്ത ചൂടോ തണുപ്പോ ഇല്ലാത്ത, ഏറ്റവും സുന്ദരവും സൌമ്യവുമായ കാലമാണ്. എന്തു കൊണ്ടാണ് നബി(സ)യുടെ ജനനം ആ മാസത്തിലായത്? ഒരു പക്ഷെ പ്രവാചക പ്രവരന്‍ റമദാനിലോ ശഅ്ബാനിലോ മറ്റ് വിശുദ്ധ മാസങ്ങളില്‍ ഏതെങ്കിലുമൊന്നിലോ ആയിരുന്നു പിറന്നിരുന്നതെങ്കില്‍, ആ മാസങ്ങളുടെ പവിത്രത കൊണ്ട് തിരുനബി മഹത്വവത്കരിക്കപ്പെടുന്നതായി ആളുകള്‍ ചിന്തിക്കാവുന്നതാണ്. പക്ഷേ, മുത്ത്‌ നബി(സ) തങ്ങള്‍ റബീഉല്‍ അവ്വലില്‍ ജനിക്കുന്നതോടെ ആ ഒരൊറ്റക്കാരണം കൊണ്ട് ആ മാസമാണ് പവിത്രീകരിക്കപ്പെടുന്നത്. അതെ ലോക ഗുരുവിന്റെ ജന്മദിനത്തിന് സാന്നിധ്യം നല്‍കിയത് കൊണ്ടാണ് വിശുദ്ധ റബീഉല്‍ അവ്വല്‍ വിശ്വാസികളില്‍ ആവേശമുയരുന്നത്. വിശ്വാസിയുടെ ഹൃദയം സന്തോഷത്താല്‍ ആനന്ദപൂരിതമാകും, മസ്ജിദുകളില്‍ നിന്നുയരുന്ന മദ്ഹു ഗീതങ്ങള്, സ്വലാത്ത് ധ്വനികള്, ഓത്തു പള്ളികളില്‍ കുട്ടികള്‍ ആവേശത്താല്‍ മുഴക്കുന്ന “യാ നബി സലാം ………” ഈരടികള്, അതെ അവിടത്തേക്ക് സ്വലാത്തുകള്‍ വര്‍ദ്ധിപ്പിച്ചും, അവിടത്തെ മദ്ഹു ആലപിച്ചും ആ പുണ്യ മാസത്തെ വരവേല്‍ക്കാന്‍ ലോകത്തിലെ എല്ലാ വിശ്വാസികളും തയ്യാറെടുക്കുകയാണ്.

ആത്മീയ ആവേശത്തോടെ പുണ്യ റബീഇനെ വാരിപ്പുണരാന്‍ വെമ്പല്‍ കൊള്ളുന്ന ഓരോ വിശ്വാസിയും പുണ്യ പ്രവാചകന്‍ (സ) തങ്ങള്‍ പഠിപ്പിക്കുകയും ഊന്നിപ്പറയുകയും ചെയ്ത വിശ്വാസികള്‍ തമ്മില്‍ ഉണ്ടായിരിക്കേണ്ട പരസ്പരം സ്നേഹവും സഹോദര്യവും അത് വീണ്ടെടുക്കുകയും ഊട്ടിയുറപ്പിക്കുകയും ചെയ്യേണ്ട സമയം കൂടിയാണ്. “അനസില്‍(റ)നിന്ന്: നബി(സ്വ) പറഞ്ഞു: നിങ്ങള്‍ പരസ്പരം ദേഷ്യപ്പെടുകയോ അസൂയ കാണിക്കുകയോ അന്യോന്യം പുറംതിരിഞ്ഞ് (പിണങ്ങി) നില്‍ക്കുകയോ ചെയ്യരുത്. അല്ലാഹുവിന്റെ അടിയാറുകളേ, നിങ്ങള്‍ സഹോദരങ്ങളാവുക. മൂന്ന് ദിവസത്തിലധികം തന്റെ സഹോദരനുമായി (മുസ്ലിമുമായി) പിണങ്ങിനില്‍ക്കല്‍ മുസ്ലിമിന് അനുവദനീയമല്ല”. പരസ്പരം സഹോദരങ്ങളാവണമെന്ന് വിശ്വാസികളെ ശക്തമായി ഉപദേശിച്ചുകൊണ്ട് അവിടെന്ന് പ്രവാചകന്‍(സ്വ) പറയുകയുണ്ടായി “അല്ലാഹുവിന്റെ ദാസന്‍മാരേ, നിങ്ങള്‍ സഹോദരങ്ങളാവുക. ഒരു മുസ്ലിം മറ്റൊരു മുസ്ലിമിന്റെ സഹോദരനാണ്. അവനോട് അക്രമം കാണിക്കുകയില്ല; അവനെ കൈവെടിയുകയില്ല; അവനെ നിസ്സാരനായി കാണുകയില്ല. എന്നിട്ട് മൂന്ന് തവണ നെഞ്ചിലേക്ക് ചൂണ്ടിക്കൊണ്ട് പ്രവാചകന്‍(സ്വ) പറഞ്ഞു: ഇവിടെയാണ് തഖ് വ, തന്റെ സഹോദരനായ മുസ്ലിമിനെ നിന്ദിക്കുന്നതുതന്നെ തിന്മയായി ഒരാള്‍ക്ക് മതി. തന്റെ സഹോദരന്റെ രക്തവും സമ്പത്തും അഭിമാനവുമെല്ലാം ഓരോ മുസ്ലിമിനും നിഷിദ്ധമാണ്” ഈ പ്രവാചക വചനം ഉള്‍ക്കൊണ്ട്‌ വര്‍ത്തിക്കാന്‍ പുണ്യ റബീഅ നമ്മുക്ക് പ്രചോദനം നല്‍കുന്നതാവട്ടെ എന്ന് പ്രാര്‍ത്ഥിക്കുന്നു.

എല്ലാവര്‍ഷവും, റബിഉല്‍ അവ്വല്‍ മാസം വന്നണയുമ്പോള്‍ ദൈവത്തിന്റെ മഹാനായ പ്രവാചകന്റെ തിരുപ്പിറവിയുടെ സ്മരണ സര്‍വ പ്രപഞ്ചങ്ങളെയും സൌരഭ്യമണിയിക്കുകയാണ്, തിരുമേനിയുടെ ജീവചരിത്ര ഗ്രന്ഥങ്ങള്‍ വായിച്ചുകൊണ്ടും അതില്‍ നിന്ന് അനര്‍ഘമായ പാഠങ്ങള്‍ ഉള്‍ക്കൊണ്ടു കൊണ്ടും കോടിക്കണക്കിന് മുസ്ലിംകള്‍ ലോകമെമ്പാടും ആ മഹാസുദിനം ആഘോഷിക്കുന്നു. തിരുമേനിയുടെ ജീവിതഗാഥ ചൊല്ലുകയും ആബാലവൃദ്ധം ജനങ്ങളിലേക്കും അതു വഴി മഹാഗുരുവിന്റെ സന്ദേശമെത്തിക്കുകയും ചെയ്യുന്നു.

പ്രവാചക സ്നേഹവും തിരുനാളിനോടും ജീവിത ദൌത്യത്തോടുമുള്ള ആദരവും ഏതൊരു മനുഷ്യനും എല്ലാ നന്മയും പ്രദാനം ചെയ്യും. മുസ്ലിമിന്‍റെ സ്നേഹം ജഢികമല്ല. ആത്മീയമാണ്. അവന്‍ മുത്ത്‌ നബിയെ ഹൃദയം നിറഞ്ഞ് സ്നേഹിക്കുന്നു, ആ സ്നേഹം സ്വലാത്തായി, ദിക്ക്റായി മൗലിദായി, വിളിയായി ഒഴുകുന്നു.

എന്നിട്ടും നമ്മുടെ കൂട്ടത്തില്‍ ചിലരുണ്ട് മുത്ത്‌ നബിയുടെ വില മനസ്സിലാക്കാത്തവര്‍…., റബിഉല്‍ അവ്വല്‍ മാസം ആഗതമാകുമ്പോള്‍ അവര്‍ക്ക് നെഞ്ചിടിപ്പ് കൂടുന്നു..! വായ്‌ തുറക്കുമ്പോള്‍ പരിഹാസം ചൊരിയുന്നവര്‍, പ്രവാചക ശ്രേഷ്ടരെ ആക്ഷേപിക്കാനായി തൂലിക ചലിപ്പിക്കുന്നവര്‍, അവിടത്തെ പൊന്നുപ്പയേയും പൊന്നുമ്മയേയും കുടുംബത്തെയും കുടുംബ പരമ്പരയില്‍പെട്ട സെയ്യിദന്മാരെയും പരിഹസിക്കാനും അവഹേളിക്കാനും സമയം കണ്ടെത്തുന്നവര്‍, ഇന്നവര്‍ അനുഭവിക്കുകയാണ്, അള്ളാഹു അവരെ സമൂഹത്തിന് മുമ്പില്‍ പരിഹാസരാക്കി, പരസ്പരം ശിര്‍ക്കാരോപിച്ചു തമ്മില്‍ കലഹിക്കുന്ന കാഴ്ച. ഇത്തരം നവീന വാദികളുടെ ശര്‍റില്‍ നിന്നും റബ്ബിനോട് കാവല്‍ തേടുക. അള്ളാഹു നമ്മുടെ ജീവിതവും മരണവും സുന്നത്ത്‌ ജമാഅത്തിന്‍റെ മര്ഗ്ഗത്തിലാക്കി തരട്ടെ (ആമീന്‍ )

‘ലോകര്‍ക്ക് മുഴുവന്‍ കാരുണ്യമായി’ അയക്കപ്പെട്ടിട്ടുള്ള പുണ്യ പ്രവാചകനെക്കാളും വലിയ എന്തനുഗ്രഹമാണ് നമുക്ക്..? എവിടേയും അരാചകത്വവും അധാര്‍മ്മികതയും നടമാടുന്ന ഇക്കാലത്ത് മദ്യത്തിനെതിരെ, ചൂതാട്ടത്തിനെതിരെ, കൊലക്കും കൊള്ളക്കുമെതിരില്‍, വ്യഭിചാരത്തിനെതിരില്‍, അനീതിക്കെതിരില്‍ പ്രവാചക (സ) കാഴ്ചവെച്ച പ്രായോഗികമായ ധാര്‍മ്മിക വിപ്ലവത്തിനു വേണ്ടി ഇന്നത്തെ ലോകം ദാഹിക്കുകയാണ്.

സ്വലാത്തുകള്‍ വര്‍ദ്ധിപ്പിച്ചും അവിടെത്തെ മദ്ഹു ഗീതങ്ങള്‍ ആലപിച്ചും അവിടെത്തെ സന്ദേശങ്ങള്‍ പ്രചരിപ്പിച്ചും….നമ്മുക്കും വരവേല്‍ക്കാം ആ പുണ്യ റബീഉല്‍ അവ്വല്‍ മാസത്തെ..! നാഥന്‍ തുണക്കട്ടെ (ആമീന്‍ )

ഒന്ന് പറഞ്ഞുതരാമോ, ഇതേതാ തൗഹീദ്?


Hayateen

ഓരോ മുജാഹിദ് മൗലവിമാർ  ഓരോ പ്രസ്ഥാനമായി മാറുന്നു, അതിലെ ഓരോ പാമരനും സ്വന്തം നിലക്ക് ഇജ്തിഹാദ് തുടങ്ങി. ഒരു കൂട്ടർ ആട് മേക്കുന്നതിനെ കുറിച്ചാണെങ്കിൽ,  ജിന്ന് പിശാച് വർഗത്തിന് പിന്നാലെ മറ്റൊരു കൂട്ടർ, ഉറുക്കും മന്ത്രങ്ങളും ജാഇസാക്കി ഒരുകൂട്ടർ, സിഹ്‌ർ കണ്ണേറു പരിഹാര ക്രിയകളും പ്രയോഗങ്ങളുമായും ബറകത്തുമായി  വേറെയും, സ്വർണാഭരണങ്ങളെ കുറിച്ചും സൗദി അറേബ്യയിലേക്കും സിറിയയിലേക്കും ഹിജ്റ പോകുന്നതിനെ കുറിച്ച് ഗവേഷണത്തിൽ മറ്റുചിലർ… വൈകൃതങ്ങളുടെ പര്യായമായി മാറിയ   മുജാഹിദ് തൗഹീദിലെ പുതിയ മാറ്റതിരുത്തലുകൾ അറിയാൻ മൊബൈൽ ആപ്പ് പോലെ ഇടക്കിടക്ക് അപ്ഡേറ്റ് ചെയ്ത് കൊണ്ടിരിക്കേണ്ട അവസ്ഥയാണ്.

  • മുസ്ലിം ലോകം ഇന്നേവരെ തൗഹീദിനെ വിഭജിക്കുകയോ അതിന് വ്യത്യസ്ത ഘടകങ്ങളുള്ളതായി വിശദീകരിക്കുകയോ ചെയ്തിട്ടില്ല. എന്നാല്‍ മുജാഹിദ് വിഭാഗം അതിനെ ആദ്യം രണ്ടായി ഭാഗിച്ചു. ഇപ്പോളിതാ ഇത്രയും കാലം തങ്ങള്‍ മനസ്സിലാക്കിയ തൗഹീദ് അപൂര്‍ണ്ണമായിരുന്നുവെന്നും തൗഹീദിന് രണ്ടല്ല, മൂന്ന് (റുബൂബിയ്യത്ത്, ഉലൂഹിയ്യത്ത്, അസ്മാഅ് സിഫാത്ത്) ഭാഗമുണ്ടെന്നും കണ്ടെത്തിയിരിക്കുന്നു.

  • മന്ത്രിക്കലും വെള്ളത്തില്‍ ഊതിക്കുടിക്കലുമൊക്കെ തനിശിര്‍ക്കും അന്ധവിശ്വാസവും പരമാബദ്ധവും ആയി കൂവി നടന്നവര്‍ ഇപ്പോൾ പറയുന്നു ഇതൊക്കെ തൗഹീദിന്‍റെ കടുകട്ടിയാണത്രെ! തുപ്പല്‍ തെറിപ്പിച്ച് വരേ ഊതി ചികിത്സിക്കാമത്രെ.

  • സിഹ്ര്‍ (മാരണം) കണ്ണേറ് എന്നിവയിൽ വിശ്വസിക്കാമെങ്കിലും ജിന്നിനെ വിളിക്കൽ ശിർക്കാണെന്ന് ഒരു തൗഹീദ്. എന്നാൽ സിഹ്ര്‍, കണ്ണേറ് എന്നിവ അന്ധവിശ്വാസമാണെന്ന് മറ്റൊരു തൗഹീദ്.

  • സ്ത്രീകൾക്ക് നിസ്കരിക്കാൻ വീടിന്റെ ഉള്ളറയാണ് ഉത്തമമെന്ന് പഠിപ്പിച്ച പ്രവാചക വചനങ്ങളെ ധിക്കരിച്ച് സ്ത്രീകളെ പള്ളിയിലേക്ക് എഴുന്നുള്ളിച്ചവർ ഇപ്പോൾ പറയുന്നു മുജാഹിദ് പള്ളിയിൽ ആണിനും പെണ്ണിനും ഇടയിൽ മറ ഇടുന്നത് ബിദ്അത്താണെന്നും, ഇട കലർന്നാണ് നിൽക്കേണ്ടതെന്നും, സുന്നികളെ പേടിച്ച് ഇടയിൽ മറ ഇട്ട് സുന്നത്ത് നഷ്ടപ്പെടുത്തേണ്ട കാര്യമില്ലെന്നും.

  • മൊഹിയുദ്ദീൻ മാലയിലും മങ്കൂസ് മൗലിദിലും ‘ശിർക്ക്’ കണ്ടുപിടിച്ചവർക്ക് മുജാഹിദ് നേതാവ് ഉമർ മൗലവി മരണപ്പെട്ടപ്പോൾ വിചിന്തനം മാസികയിൽ പ്രസിദ്ധപ്പെടുത്തിയ ‘ഉമർ മൗലവി മാല’യിലെ ശിർക്ക് തൗഹീദായി.

  • ജിന്ന് മലക്ക് എന്നിവരോട് സഹായം തേടൽ ബഹുദൈവ ആരാധനയായി കൊണ്ടു നടന്നവർക്കിപ്പോൾ, വിജനമായ മരുഭൂമിയിൽ നിന്ന് ആരെങ്കിലും(ജിന്ന്, മലക്ക്, മനുഷ്യൻ) സഹായിക്കും എന്ന് കരുതി അല്ലാഹുവിന്റെ പടപ്പുകളേ സഹായിക്കണേ എന്ന് തേടിയാൽ തൗഹീദാണെത്രെ.

  • മരണ ശേഷം സ്വിറാത്ത് പാലം ഉണ്ടെന്ന് വിശ്വസിച്ച് വന്നിരുന്ന മുജാഹിദുകൾക്ക് ഇപ്പോളത്  അന്ധവിശ്വാസമായി, കൂടാതെ നന്മ, തിന്മകള്‍ തൂക്കുന്ന തുലാസ്, മസീഹുദജ്ജാൽ, ഖബറിലെ ശിക്ഷ, ചന്ദ്രനെ പിളര്‍ത്തിയ സംഭവം…. എല്ലാം അന്ധവിശ്വാസമായി.

  • കുട്ടി ജനിച്ചുകഴിഞ്ഞാൽ ചെവിയില്‍ ബാങ്ക് കൊടുക്കൽ നബി ചര്യയായി കണ്ടിരുന്ന മുജാഹിദുകൾ ഇപ്പോൾ പറയുന്നു ഒരു സ്ത്രീ പ്രസവിച്ച ഉടനെ കുട്ടിയുടെ വലതു ചെവിയില്‍ ബാങ്കും ഇടതു ചെവിയില്‍ ഇഖാമത്തും കൊടുക്കുന്ന സമ്പ്രദായം നബി ചര്യയല്ലത്രേ.

  • മുസ്ലിംകൾ ഹജറുൽ അസ് വദിനെ ആദരിക്കുകയും സംസം പുണ്യ പാനീയമായി രോഗശമനത്തിന് ഉപയോഗിച്ച് വരുമ്പോൾ, മുജാഹിദുകൾ ഹജറുൽ അസ് വദും സംസവും ഒരു പ്രത്യേകതയുമില്ലെന്നും മാത്രമല്ല ഇപ്പോളവർ സംസം വെള്ളം കൊണ്ട് മൂത്രമൊഴിക്കാൻ ഉപയോഗിക്കുന്നുവെന്ന് പരസ്യമായി വിളിച്ചുപറഞ്ഞു അവഹേളിക്കുകയും ചെയ്യുന്നു.

  • വാക്‌സിനേഷനും, രോഗം ബാധിച്ചാല്‍ ഡോക്ടര്‍മാരെ കാണുന്നതും ശിര്‍ക്കാണെന്ന് ഒരു തൗഹീദ്. രോഗം വന്നാൽ ഏതെങ്കിലും ഡോക്ടറെ കാണുന്നത് പ്രശ്നമില്ലെന്നും എന്നാൽ രണ്ടാമത് രോഗം വന്നാൽ രോഗം മാറുമെന്ന് കരുതി അതേ ഡോക്ടറെ വീണ്ടും കാണൽ ശിർക്കാണെന്ന് മറ്റൊരു തൗഹീദ്.

  • നിലവിളക്കിൽ ദീപം കൊളുത്തി ഉദ്ഘാടിക്കാൻ തയ്യാറായി മുജാഹിദ് നേതാവ്. മുത്തുക്കുടയും, തിരുവാതിര തരുണീമണികളും, പരശുരാമ കോലവും, മഹാബലിയും, തരുണീമണികളുടെ കോല്‍ക്കളിയും, ശിങ്കാരിമേളവും, പുലികളിയും, തെയ്യവും, തുള്ളലും, കൈകൊട്ടിക്കളിയും, ചെണ്ട മേളവും… തുടങ്ങി അകമ്പടിയോടെ സലഫി ഫെസ്റ്റുമായി മറ്റൊരുകൂട്ടർ.

  • സ്വഹാബികൾ ചെയ്തുവന്നിരുന്ന വെള്ളിയാഴ്ചയിലെ രണ്ടുബാങ്ക്, മുത്വലാക്ക്, തറാവീഹ് 20 റക്അത്ത്… തുടങ്ങിയവ തള്ളിയത് സ്വഹാബികളുടെ വീക്ഷണങ്ങളെ കേരളം മുജാഹിദ് പ്രസ്ഥാനം അംഗീകരിക്കാത്തത് കൊണ്ടാണെന്ന് വ്യക്തമാക്കി മുജാഹിദ് പ്രസിദ്ധീകരണം.

  • സുന്നികൾ ചെയ്തിരുന്ന പിഞ്ഞാണമെഴുത്ത് പരിഹസിച്ചുനടന്നവർ ഇപ്പോൾ പറയുന്നു ഖുർആനിലെ ചില സൂക്തങ്ങൾ ഏതെങ്കിലും പാത്രത്തിലോ മറ്റോ എഴുതി, വെള്ളംകൊണ്ട് മായ്ച്ചശേഷം ആ വെള്ളംകൊണ്ട് കുടിക്കുകയോ ശരീരം കഴുകുകയോ ചെയ്യൽ സലഫു സ്വാലിഹീങ്ങളുടെ ചര്യയിൽ പെട്ടതാണത്രെ.(…..വൈകൃതങ്ങൾ ഇവിടെ തീരുന്നില്ല)

പതിമൂന്ന് നൂറ്റാണ്ടുകാലത്തെ മുസ്‌ലിംകളത്രയും ബഹുദൈവാരാധകരായി മുദ്രയടിച്ച് ‘ശുദ്ധ തൗഹീദ്’ അവകാശപ്പെട്ടു ജന്മമെടുത്ത മുജാഹിദ് പ്രസ്ഥാനം ഇന്ന് ചക്കിനു ചുറ്റും തിരിയുന്ന കാളയെപ്പോലെ വട്ടം ചുറ്റുകയാണ്‌. ഇതുവരെ കൃത്യമായി എന്താണ് തൗഹീദ് എന്താണ് ശിര്‍ക്ക് എന്ന് നിര്‍വചിക്കാന്‍ കഴിയാതെ ഒരു നൂറ്റാണ്ട് തികയുംമുമ്പേ ചിന്നിച്ചിതറി മതത്തിനും പൊതുസമൂഹത്തിനു മുന്നിൽ പരിഹാസമായി അധഃപതിച്ചുപോയി. അവസാനം വാക്സിനേഷനിലൂടെ കയറുന്ന ശിർക്കും, അമുസ്ലിംകളോട് പുഞ്ചിരിച്ചാൽ പകരുന്ന കുഫ്‌റും, ഡോക്ടറെ കണ്ടാൽ ഒലിച്ചുപോകുന്ന ഏറ്റവും ദുർബല തൗഹീദുമായി മുജാഹിദ്  പ്രസ്ഥാനം  നാൾക്കുനാൾ കൂടുതൽ കൂടുതൽ വൈകൃതങ്ങളും വൈരുദ്ധ്യങ്ങളുമായി അന്ധകാരത്തിന്റെ പടുകുഴിയിലേക്ക് കൂപ്പുകുത്തി കൊണ്ടിരിക്കുന്നു. കേരളകരയിൽ നവോത്ഥാനത്തിന്റെ പട്ടവും കെട്ടി ജന്മമെടുത്ത മുജാഹിദ് പ്രസ്ഥാനത്തിന്  സംഭവിച്ച അധഃപതനം, തിരിച്ചടി കാലം കരുതിവെച്ച അനിവാര്യതയായിരുന്നു.

———അബു ഫാത്തിമ ഫൈഹ———

 

By Muslim Ummath Posted in Islamic