മഹാന്മാര്‍

ഖാജ മുഈനുദ്ദീന്‍ ചിശ്തി അല്‍ അജ്മീരി

ഹിജ്റ വര്‍ഷം 530 റജബ് 14 നു ഇറാനിലെ സഞ്ചര്‍ എന്ന ഗ്രാമത്തിലാണ് ഖാജയുടെ ജനനം. പണ്ഡിതനും സൂഫിവര്യനുമായിരുന്ന ഹസ്രത്ത്‌ ഗിയാസുദ്ദീന്‍ (റ) ആണ് പിതാവ്‌. മാതാവ് ഉമ്മുല്‍ വറഅ് മാഹിനൂര്‍ ബീവി (റ) യാണ്. ശൈഖുല്‍ ഹിന്ദ്‌ , മുഈനുല്‍ ഹിന്ദ്‌ , ഖുതുബുല്‍ ഹിന്ദ്‌ എന്നീ പേരുകളില്‍ അറിയപ്പെടുന്ന ഖാജയുടെ യദാര്‍ത്ഥ നാമം ഹസന്‍ എന്നാണ്. അവിടുത്തെ മാതൃ പിതൃ പരമ്പരകള്‍ റസൂല്‍ തിരുമേനിയില്‍ ചെന്ന് ചേരുന്നു. അനേകം മഹത്തുക്കള്‍ പിറവിയെടുത്ത വിശുദ്ധമായ പരമ്പരയാണ ദ്ദേഹത്തിന്‍റെത്.

പിതാവിന്റെ മേല്‍നോട്ടത്തില്‍ ഖുറാസാനില്‍ വെച്ച് ബഹു: ഖാജാ പ്രാഥമിക വിദ്യാഭ്യാസം നേടി . പിന്നീട് ഹസ്രത്ത്‌ ഹുസാമുദ്ദീന്‍ (റ) ല്‍ നിന്ന് വിശുദ്ധ ഖുര്‍ആന്‍ ഹൃദിസ്ഥമാക്കി. ഫാര്‍സി,അറബി തുടങ്ങിയ ഭാഷകള്‍ അഭ്യസിച്ചു. ഖുര്‍ആന്‍, ഹദീസ്‌, ഫിഖ്ഹ്, മന്‍ത്വി ഖ് , ബാലാഗ തുടങ്ങിയ അനേകം വിജ്ഞാന ശാഖകളില്‍ അവഗാഹം നേടി. കൌമാരത്തില്‍ തന്നെ മാതാവും പിതാവും അന്ത്യയാത്രയായി.

ഹസ്രത്ത് ഇബാഹിം ഖന്‍ദൂസി (റ) യുമായുള്ള ബന്ധം ഖാജായുടെ അദ്ധ്യാത്മിക ജീവിതത്തില്‍ സുപ്രധാന വഴിത്തിരിവായി. ഹസ്രത്ത്‌ ഖാജാ ഉസ്മാനുല്‍ ഹാറൂനി ആത്മീയ ഔന്നിത്യങ്ങളുടെ പാരമ്യതകളിലേക്ക് കൈപിടിച്ചുയര്‍ത്തി. ആത്മീയോല്‍ക്കര്‍ഷത്തിന്റെ പാതയിലൂടെ പ്രയാണ മാരംഭിച്ച ശൈഖവര്‍കള്‍ ലോകത്തിന്റെ വിവിധ ഭാഗങ്ങളില്‍ ചുറ്റി സഞ്ചരിച്ചു. ആത്മീയ ഗുരുക്കന്മാരുമായി ബന്ധം സ്ഥാപിച്ചു തന്റെ ആത്മീയ ദര്‍ശനത്തിനു മിഴിവും ശോഭയും വര്‍ദ്ധിപ്പിക്കാന്‍ പ്രസ്തുത യാത്രകള്‍ നിമിത്തമായി

തിരുനബി നിര്‍ദ്ദേശപ്രകാരം ഇന്ത്യയിലെത്തിയ ശൈഖവരര്‍കള്‍ സത്യമതപ്രബോധനത്തില്‍ വ്യാപൃതനായി. നിരവധി കറാമത്തുകള്‍ പ്രകടിപ്പിച്ച മഹാനര്‍കളിലൂടെ ആയിരങ്ങള്‍ പരിശുദ്ധ ഇസ്‌ലാം പുല്‍കി. ആധ്യാത്മിക വിജ്ഞാനങ്ങളെ പരിപോഷിപ്പിക്കുന്ന നിരവധി ഗ്രന്ഥ രചനകള്‍ ശൈഖവര്‍കള്‍ നടത്തിയെങ്കിലും പില്‍ക്കാലത്ത്‌ അവയില്‍ പലതും നഷ്ടപ്പെട്ടു. കന്‍സുല്‍ അസ്റാര്‍, രിസാലത്തുല്‍ വുജൂദിയ്യ, ഹദീസുല്‍ മആരിഫ്, ദിവാനു ഖാജാ, അനീസുല്‍ അര്‍വാഹ് എന്നിവ അവയില്‍ ചിലതാണ്. ഖുത്ബും സൂഫിയുമായ ഖാജാ മുഈനുദ്ദീന്‍ ബഖ്ത്തിയാര്‍ കാക്കി(റ) , ശൈഖ് ഹമീദുദ്ദീന്‍(റ) എന്നിവര്‍ മുരീദുമാരില്‍ പ്രമുഖരാണ്.

അജ്മീറിലെ ഗവര്‍ണറും പണ്ഡിത പ്രമുഖനുമായിരുന്ന സയ്യിദ്‌ വജീഹുദ്ദീന്‍ മശ്ഹദി (റ) വിന്റെ മകള്‍ ഇസ്മത്ത് എന്നവരെയാണ് ഖാജ വിവാഹം കഴിച്ചത്. ഒരു ഭരണാധിപന്റെ പുത്രിയായ അമത്തുല്ലാ ബീവിയെയും പിന്നീട് വിവാഹം ചെയ്തു. ഖാജാ മുഹിയുദ്ദീന്‍, ഖാജാ ഫഖ്‌റുദ്ദീന്‍ , ഖാജാ ഹുസാമുദ്ദീന്‍ എന്നിവര്‍ ആദ്യഭാര്യയിലുണ്ടായ മക്കളാണ്. ഹാഫിസ്‌ ജമാല്‍ എന്ന മകള്‍ മാത്രമാണ് രണ്ടാം ഭാര്യയായ അമത്തുല്ലയില്‍ ജനിച്ചത്. ഔലിയാക്കളുടെ ശ്രേണിയിലെ സൂര്യ ജ്യോതിസ്സായ ആ മഹാന്‍ തന്റെ തൊണ്ണൂറ്റി ആറാം വയസ്സിലാണ് വഫാത്തായതെന്നാണ് പ്രബലാഭിപ്രായം. റജബ് മാസം ആറിനായിരുന്നു ഖാജാ അവര്‍കളുടെ വഫാത്ത്.

ഇബ്രാഹിം ബാദുഷ – ഏര്‍വാടി

മദീനയില്‍ തിരു നബി കുടുംബ പരമ്പരയില്‍ ഇബ്രാഹിം ബാദുഷ വലി ഹിജ്റ 630 റമളാന്‍ 3 നാണ് ഭൂജാതനായതെന്ന് കരുതപ്പെടുന്നു. സയ്യിദ്‌ അഹമ്മദ്‌ അലിയും ഫാത്തിമാബീവിയുമാണ് മാതാപിതാക്കള്‍ . ചെറുപ്പത്തില്‍ തന്നെ മത വിജ്ഞാനവും മറ്റു അറിവുകളും കരസ്ഥമാക്കി. സത്യസന്ധത , വിനയം , ദീനീ ബോധം തുടങ്ങിയ സ്വഭാവഗുണങ്ങള്‍ ഒത്തിണങ്ങിയ ഉത്തമ പുരുഷനായി മഹാന്‍ വളര്‍ന്നു വന്നു. മദീനയിലെ ഗവര്‍ണ്ണറാ യിരുന്ന പിതാവിനെ സഹായിക്കുകയും ഇസ്‌ലാമിക പ്രബോധനത്തില്‍ മുഴുകുകയും ചെയ്തു. ദുര്‍ബല വിഭാഗങ്ങളെ സഹായിക്കുന്നതില്‍ വ്യാപൃതനായ ഇബ്രാഹിം ബാദുഷ അനുകരണനീയമായ വ്യക്തിത്വവും ആദരവും നേടി.

സൈനബ് (റ) ആണ് മഹാനവര്‍കളുടെ പത്നി. മസ്ജിദുന്നബവി യിലായിരുന്നു മഹാന്റെ സ്ഥിരതാമസം . വിശുദ്ധ ഖുര്‍ആന്‍ പാരായണവും ദീനീ വിജ്ഞാന പ്രചാരണവുമായി കഴിഞ്ഞു കൂടവെ അബൂതാഹിര്‍ എന്ന ബാലനെ നല്‍കി അല്ലാഹു ആ ഭക്ത ദമ്പതികളെ അനുഗ്രഹിച്ചു.

ഇന്ത്യയില്‍ ചെന്ന് സത്യപ്രബോധനം നടത്താന്‍ പ്രവാചക സ്വപ്ന ദര്‍ശനമുണ്ടായി. മസ്ജിദുന്നബവിയില്‍ വെച്ചായിരുന്നു ഈ സംഭവം . സ്വപ്ന ദര്‍ശനത്തില്‍ പാരിതോഷികമായി വിശേഷപ്പെട്ട ഒരു കിരീടവും വാളും പ്രവാചകന്‍ ബാദുഷാക്ക് നല്‍കി. തിരുനബിയാജ്ഞ ശിരസാവഹിച്ചു മൂവ്വായിരത്തോളം അനുചരന്‍മാരോടൊപ്പം ഇറാഖ്‌, ഇറാന്‍, ബലൂചിസ്ഥാന്‍ വഴി ഇന്ത്യയിലെത്തി.

സിന്ധിലും തുടര്‍ന്ന് ഗുജറാത്തിലും സത്യ ദീനിന്റെ പൊന്‍ പ്രഭയുമായി കടന്നു ചെന്നു . സാമ്പ്രദായിക നാടുവാഴിത്വത്തിന്റെയും ജാതീയതയുടെയും ക്ലേശങ്ങളില്‍ പൊരുതി മുട്ടിയ ജനം ഇസ്‌ലാമിനെ വാരിപ്പുണര്‍ന്നു. അധികാര നഷ്ടം ഭയന്ന നാടുവാഴികള്‍ യുദ്ധത്തിന്‌ സന്നദ്ധരായി. അധികാരമല്ല ദീനീ പ്രബോധനമാണ് തങ്ങളുടെ ലക്ഷ്യമെന്ന് അധികാരികളെ ബോധ്യപ്പെടുത്തിയെങ്കിലും ഫലമുണ്ടായില്ല. ഒടുവില്‍ നാടുവാഴികള്‍ ആഗ്രഹിച്ചത്‌ പോലെ ഏകപക്ഷീയമായ ആക്രമണം നടന്നു. ആത്മ രക്ഷാര്‍ത്ഥം നാടുവാഴീ സൈന്യങ്ങളെ നേരിടാന്‍ ബാദുഷയും അനുയായികളും നിര്‍ബന്ധിതരായി. സിന്ധിലും ഗുജറാത്തിലും ഇപ്രകാരം ആത്മ രക്ഷാര്‍ത്ഥം പ്രതിരോധിക്കേണ്ട വന്ന സത്യപ്രബോധക സംഘത്തെ വിജയം തുണച്ചു. ഗുജറാത്തില്‍ ആലിജനാബിനെയും സിന്ധില്‍ ദുല്‍ഫുഖാര്‍ അലി ഖാനെയും തന്റെ പ്രതിനിധികളായി നിയമിച്ചു ഇബ്രാഹിം ബാദുഷ മദീനയിലേക്ക് യാത്രയായി.

അല്‍പ കാലങ്ങള്‍ക്കുള്ളില്‍ വന്ദ്യനായ പിതാവിന്റെ വഫാത്തോട് കൂടി മദീനയിലെ ഗവര്‍ണര്‍ സ്ഥാനമേറ്റെടുക്കേണ്ടി വന്നു. ഔദ്യോഗിക കൃത്യ നിരവ്വഹണവും ആരാധനയുമായി കഴിയവേ തെക്കേ ഇന്ത്യയിലെ പ്രബോധന ചുമതല ഏറ്റെടുക്കാന്‍ പ്രവാചക കല്പന ഉണ്ടായി. പാണ്ഡ്യ രാജ്യത്തെ കിരാത ഭരണത്തില്‍ നിന്നും ജനങ്ങളെ മോചിപ്പിച്ച് സത്യ ദീനിലേക്ക് കൊണ്ടുവരാനുള്ള തിരുകല്പനയാണ് സ്വപ്നത്തിലൂടെ തിരുനബി നല്‍കിയത്‌. അവിടെയാണ് ബാദുഷയുടെ അന്ത്യ വിശ്രമ സ്ഥാനം എന്നും തിരു നബി അരുള്‍ ചെയ്തു. തിരു കല്പനയെ ത്തുടര്‍ന്ന് ഒരു വെള്ളിയാഴ്ച ജുമുഅ നിസ്കാരാന്തരം ഇബ്രാഹിം ബാദുഷയും സംഘവും തെക്കേ ഇന്ത്യയിലേക്ക് യാത്ര തുടങ്ങി. കണ്ണൂരിലാണ് അവര്‍ കപ്പലിറങ്ങിയത്. തുടര്‍ന്ന് കണ്ണൂരിലും കൊച്ചി ആലപ്പുഴ വിഴിഞ്ഞം കൊല്ലം തുടങ്ങിയ സ്ഥലങ്ങളില്‍ കൂടാരമടിച്ചു പ്രബോധനം നടത്തി. പിന്നീട് കായല്‍പ്പട്ടണത്തും തിരുനെല്‍വേലി മധുര രാമനാഥപുരം എന്നീ മൂന്ന് ജില്ലകള്‍ ഉള്‍ക്കൊള്ളുന്ന പാണ്ഡ്യ രാജ്യത്തുമെത്തി.

പാണ്ഡ്യ രാജ്യത്ത് ജാതീ വ്യവസ്ഥയുടെ ക്രൂരതകള്‍ക്ക്‌ ഇരയാകേണ്ടി വന്നവരായിരുന്നു താഴ്ന്ന ജാതിക്കാര്‍. ഉയര്‍ന്ന ജാതിക്കാരുടെ നാനാവിധ പീഢനങ്ങള്‍ ഏറ്റുവാങ്ങിയിരുന്ന ഹരിജനങ്ങളുടെ പരിതാപകരാവസ്ഥ കണ്ട് ഇബ്രാഹിം ബാദുഷയുടെ മനം നൊന്തു. മനുഷ്യരെല്ലാം ഒന്നാണെന്നും അവരെ ജാതി തിരിച്ച് വേലി കെട്ടി നിരുത്തരുതെന്നും അദ്ദേഹം ആഢ്യന്മാരെ ഉത്ബോധിപ്പിച്ചു. എന്നാല്‍ ഇതൊന്നും പൌര മുഖ്യന്മാര്‍ക്ക് തീരെ സഹിച്ചില്ല .

രാമനാഥപുരം വിക്രമ പാണ്ഡ്യനും തിരുനെല്‍വേലി കുലശേഖര പാണ്ഡ്യനും മധുര തിരുപാണ്ഡ്യനുമാണ് ഭരിച്ചിരുന്നത്. പിതാവിന്റെ മരണ ശേഷം പരസ്പരം കലഹിച്ചിരുന്ന മൂവരും ഇബ്രാഹിം ബാദുഷയെയും കൂട്ടാളികളെയും നേരിടാന്‍ വേണ്ടി ഒന്നിച്ചു. മധുര പിടിച്ചടക്കാന്‍ വേണ്ടി നിരന്തരം ശ്രമിച്ചിരുന്ന ചോളന്മാരും ഒളിയാക്രമണങ്ങളുമായി രംഗത്തുണ്ടായിരുന്നു. നേരിട്ടുള്ള ഏറ്റുമുട്ടല്‍ നടത്തി ഇബ്രാഹിം ബാദുഷയെയും കൂട്ടരെയും നശിപ്പിക്കാമെന്ന വ്യമോഹമായിരുന്നു പാണ്ട്യ രാജാക്കന്മാര്‍ക്ക്. യുദ്ധക്കൊതി പൂണ്ട പാണ്ഡ്യപ്പടയുമായി നിവൃത്തിയില്ലാതെ ഇബ്രാഹിം ബാദുഷയും കൂട്ടരും ഏറ്റുമുട്ടുകയും പലപ്രാവശ്യം വിജയം നേടുകയും ചെയ്തു. മധുരയും മറ്റു സ്ഥലങ്ങളും ഇബ്രാഹിം ബാദുഷക്ക് കീഴ്പ്പെട്ടു. ജനക്ഷേമകരമായ പല പ്രവര്‍ത്തനങ്ങളും കാഴ്ച വെച്ചു. അധമരും അപൂര്‍ണ്ണരുമായി കാണപ്പെട്ടിരുന്ന ജനങ്ങളെ ഒരൊറ്റ വര്‍ഗമായി അദ്ദേഹം സ്നേഹിച്ചതു കാരണം എല്ലാവരും അദ്ദേഹത്തെ ബഹുമാനിച്ചു. പൌത്രമാണിക്യപ്പട്ടണം തന്റെ ഭരണത്തിന്‍ കീഴില്‍ ഏര്‍പ‌ദ് എന്ന് പുനര്‍നാമകരണം ചെയ്തു. ഇത് പിന്നീട് ഏര്‍വാടിയായി മാറി. കൂട്ടമായ ആക്രമണത്തിലൂടെയും ചതി പ്രയോഗത്തിലൂടെയും പാണ്ഡ്യര്‍ ഇബ്രാഹിം ബാദുഷയെയും അവിടുത്തെ പുത്രന്മാരെയും മറ്റു പ്രമുഖരെയും വധിച്ചു. ഏര്‍വാടിയിലും കാട്ടുപള്ളിയിലും മറ്റുമായി ആ മഹാന്മാര്‍ അന്ത്യവിശ്രമം കൊള്ളുന്നു. ഇടക്കാലത്ത്‌ ആരാലും അറിയപ്പെടാതെ മറഞ്ഞു കിടന്ന എര്‍വാടിയെ 18ാം നൂറ്റാണ്ടില്‍ ജീവിച്ച നല്ല ഇബ്രാഹിം എന്ന മഹാനാണ് പുനരുദ്ധരിച്ചത്. കീളക്കരക്കും ഏര്‍വാടിക്കും ഇടക്ക് ആ മഹാന്‍ അന്ത്യ വിശ്രമം കൊള്ളുന്നു.

ഖുതുബുസ്സമാന്‍ സയ്യിദ്‌ അലവി തങ്ങള്‍ – മമ്പുറം

അഹ്‌ലു ബൈത്തിൽ പിറന്ന് ആത്മീയതയുടെ ഔന്നിത്യങ്ങൾ കീഴടക്കി പാണ്ഡിത്യത്തിന്റെ നിറകുടമായിരുന്ന മമ്പുറം സയ്യിദ് അലവി തങ്ങളുടെ ചരിത്രം ഒരു കാലഘട്ടത്തിന്റെ ഇസ്‌ലാമിക ചരിത്രം കൂടിയാണ്‌.ജീവിത വിശുദ്ധിയും ലാളിത്യവും കൈമുതലായിരുന്ന തങ്ങൾ ഉയർത്തിപ്പിടിച്ച ദേശസ്നേഹവും മതമൈത്രിയും വൈദേശികാധിപത്യ ത്തോടുള്ള വിരോധവും ചരിത്രത്തിന്റെ സുവർണ ലിപികലിൽ ഉല്ലേഖനം ചെയ്യപ്പെട്ടവയാണ്‌. ഒരു ദേശത്തിന്റെയും ഒരു സമൂഹത്തിന്റെയും നവോദ്ധാനം തന്റെ ദൗത്യമായി കരുതിയ തങ്ങളുടെ ചരിത്രമില്ലാതെ മലബാറിന്റെ ഇസ്‌ലാമിക ചരിത്രം പൂർണമാവില്ല.

രാജ്യ സ്നേഹവും ബ്രിട്ടീഷ് വിരോധവും മത മൈത്രിയും ഉയർത്തിപ്പിടിച്ച മഹാനയൊരു സാമൂഹ്യ പരിഷ്കർത്താവും സയ്യിദും വലിയ്യുമായിരുന്നു ഖുതുബുസ്സമാൻ സയ്യിദ് അലവി തങ്ങൾ.

മഹാനവർകളുടെ സ്വദേശം യമനിൽ ഹളർമൗതിലെ തരീം എന്ന പട്ടണമാണ്‌. ഹിജ്റ 1166 ൽ ദുൽഹജ്ജ് 23 നു മുഹമ്മദ്ബ്നുസഹ്ൽ മൗലദ്ദവീലയുടെയും സയ്യിദത്ത് ഫാതിമാ ജിഫ്‌രിയ്യയുടെയും ഏക മകനായാണ്‌ മഹാനവർകൾ ജനിക്കുന്നത്. അറബി ഭാഷയിൽ നൈപുണ്യം നേടിയ അദ്ദേഹം ബാല്യകാലത്ത് തന്നെ ഖുർആൻ മന:പാഠമാക്കി.തരീമിലെ ഒരു പ്രമുഖ ശൈഖിന്റെ ശിക്ഷണതിൽ വിദ്യയഭ്യസിച്ചു. സൽസ്വഭാവിയും ആദർശ ശാലിയും ആത്മീയ പരിശീലനം നേടിയ ഒരു ഭക്തനുമായി മാറിയ മഹാനവർകൾ തന്റെ മാതുലന്മാർ മലബാറിൽ താമസിക്കുകയാണെന്ന് അറിയാനിടയായി. അങ്ങനെ പതിനേഴാം വയസ്സിൽ ഹിജ്റ 1183 ൽ അദ്ദേഹം കൊഴിക്കോട്ട് കപ്പലിറങ്ങി. അമ്മാവനായ ഹസൻ ജിഫ്‌രി തങ്ങളുടെ ഖബ്‌ർ സന്ദർശിക്കലായിരുന്നു ഉദ്ദേശം. കോഴിക്കോട്ടെത്തി ശൈഖ് ജിഫ്‌രിയുമൊത്ത് മമ്പുറത്ത് വന്നു സിയാറത്ത് നടത്തി. ശൈഖ് ജിഫ്‌രി കോഴിക്കോട്ടേക്ക് മടങ്ങുകയും തങ്ങളവർകൾ മമ്പുറത്ത് താമസമാക്കുകയും ചെയ്തു. തുടർന്ന് അമ്മാവൻ ഹസൻ ജിഫ്‌രി തങ്ങളുടെ മകൾ ഫാത്തിമ ജിഫ്‌രിയ്യയെ വിവാഹം ചെയ്ത് മമ്പുറത്ത് ഇപ്പോഴുള്ള മാളിയേക്കൽ വീട്ടിലേക്ക് താമസം മാറ്റി.

കൊയിലാണ്ടി സയ്യിദ് അബൂബക്കർ മദനിയുടെ മകൾ ഫാത്വിമ, പൊന്മുണ്ടം സ്വദേശി ആയിശാ മലബാരിയ്യ ഇന്തൊനേഷ്യയിലെ സ്വാലിഹാ ടിമോറി തുടങ്ങിയവർ മറ്റു ഭാര്യമാരാണ്‌.രണ്ടാമത്തെ ഭാര്യ ഫാത്തിമാ മദനിയ്യയിൽ ജനിച്ച പുത്രനനാണ്‌ സയ്യിദ് ഫസൽ പൂക്കോയ തങ്ങൾ .

ആത്മീയതയുടെ ഔന്നിത്യത്തിൽ പ്രശോഭിച്ച സയ്യിദവർകൾ സർവ്വ മതക്കാർക്കും ആശ്വാസവും അത്താണിയുമായിരുന്നു. മലയാള ഭാഷാ പഠനത്തെ തങ്ങൾ പ്രോൽസാഹിപ്പിച്ചു.നിരവധി കറാമത്തിനാൽ അനുഗ്രഹീതനായ തങ്ങൾ ഹിജ്‌റ 1260 മുഹറം ആറിനു വഫാത്തായി.മമ്പുറം മഖാമിൽ തന്റെ അമ്മാവനും ഭാര്യാപിതാവുമായ ഹസൻ ജിഫ്രി തങ്ങളുടെ സമീപത്തായി മഹാൻ അന്ത്യ വിശ്രമം കൊള്ളുന്നു.

ഇന്നു ജാതി മത ഭേദമെന്ന്യേ നിരവധിയാളുകൾ സിയാറത്ത് ചെയ്യുന്ന മലപ്പുറം ജില്ലയിലെ ഒരു പ്രമുഖ തീർത്ഥാടന കേന്ദ്രമാണിത്. മലപ്പുറം പരപ്പനങ്ങാടി റൂട്ടിൽ മമ്പുറം സ്റ്റോപ്പിൽ ബസ്സിറങ്ങി പാലം കടന്നാൽ മഖാമിലെത്താം. നാഷണൽ ഹൈവെയിൽ നിന്നു വി.കെ.പടി വഴിയും മഖാമിലെത്തിച്ചേരാം.

ഉമര്‍ ഖാസി – വെളിയംകോട്

അല്ലാഹു എല്ലാ മനുഷ്യരെയും ഒരു പോലെയല്ല സൃഷ്ടിച്ചത്. ചിലരെ ചിലരെക്കാള്‍ ശ്രേഷ്ഠരാക്കി. മഹാന്മാരായ പ്രവാചകന്മാരും മുര്‍സലീങ്ങളും ഏറ്റവും ശ്രേഷ്ഠര്‍ തന്നെ. അല്ലാഹുവിന്റെ ഔലിയാക്കളും സച്ചരിതരുമായ മുന്‍ഗാമികളില്‍ കേരളത്തില്‍ ജീവിച്ചു വഫാത്തായ മഹാനാണ് ഉമര്‍ ഖാസി. സുപ്രസിദ്ധ പണ്ഡിതന്‍ കൂടി ആയിരുന്ന ഉമര്‍ ഖാസി മമ്പുറം ഖുതുബുസ്സമാന്‍ സയ്യിദ്‌ അലവി തങ്ങളുടെ സമകാലികനായിരുന്നു. പ്രവാചക പ്രേമത്തിന്റെ ഈരടികള്‍ തിരു നബി സന്നിധിയില്‍ വെച്ച് ഉരുവിട്ടപ്പോള്‍ റൌള ശരീഫ്‌ തുറക്കപ്പെട്ടതടക്കം നിരവധി കറാമത്തുകള്‍ക്കുടമയാണ്.

ക്രിസ്താബ്ദം 1757 ല്‍ വെളിയംകോട്ട് ജനിച്ചു. ഖാസിയാരകത്ത്‌ ആലി മുസ്ലിയാരാണ് പിതാവ്. പ്രധാനമായും അറിവ് നുകര്‍ന്നത് അക്കാലത്തെ വിശ്രുത പണ്ഡിതാനായിരുന്ന മമ്മിക്കുട്ടി ഖാസിയില്‍ നിന്നാണ്.പൊതുജന സേവന രംഗത്തും തനതായ വ്യക്തി മുദ്ര പതിപ്പിച്ച മഹാനാണ് ഉമര്‍ ഖാസി. ഗാന്ധിജിയുടെ നികുതി നിഷേധ പ്രസ്ഥാനത്തിനും മുമ്പ്‌ നികുതി നിഷേധം നടപ്പിലാക്കിയ ധീര ദേശാഭിമാനിയും സ്വാതന്ത്ര്യ സമര നായകനുമാണദ്ദേഹം. ബ്രിട്ടീഷുകാരോട് മമ്പുറം തങ്ങള്‍ക്കുണ്ടായിരുന്ന ഈര്‍ഷ്യത ഉമര്‍ ഖാസിക്കുമുണ്ടായിരുന്നു. ബ്രിട്ടീഷുകാരന്റെ മര്‍ദ്ദനത്തിലും ചൂഷണത്തിലും പൊറുതി മുട്ടിയ ഇന്ത്യന്‍ ജനതയെ മോചിപ്പിക്കേണ്ടത് മുസല്‍മാന്‍റെ ബാധ്യതയാണെന്നായിരുന്നു മഹാനവര്‍കള്‍ വിശ്വസിച്ചത്. അല്ലാഹു അല്ലാത്ത ഒരു ശക്തിക്കും അടിമപ്പെട്ടു ജീവിക്കില്ലെന്നു ഉറക്കെ പ്രഖ്യാപിച്ചു. ബ്രിട്ടിഷുകാരുമായി ഒരു വിട്ടു വീഴ്ചക്കും തയ്യാറായില്ല. ബ്രിട്ടീഷുകാര്‍ക്കെതിരെ രംഗത്തിറങ്ങാന്‍ ആവശ്യപ്പെട്ടു നിരവധി ഫത്‌വകളും അദ്ദേഹം എഴുതി. ബ്രിട്ടീഷുകാരെ എതിര്‍ത്തതിന്റെ പേരില്‍ ജയില്‍ വാസം അനുഭവിച്ചിട്ടുമുണ്ട്.

മുസ്‌ലിം നവോദ്ധാന നായകനും മികച്ച സാമൂഹ്യ പരിഷ്കര്‍ത്താവു മായിരുന്ന ഉമര്‍ ഖാസി വിശ്രുതനായ ഒരു കവി കൂടിയായിരുന്നു.നിരവധി പ്രവാചക പ്രകീര്‍ത്തന കാവ്യങ്ങള്‍ രചിച്ചിട്ടുണ്ട്.” നഫാഇസുദ്ദുറര്‍, മഖാസിദുന്നികാഹ്, സ്വല്ലല്‍ ഇലാഹ് ബൈത്ത്, അടിക്കണക്ക് ബൈത്ത്” എന്നിവ അവയില്‍ ചിലതാണ്. അസാമാന്യ ധൈഷണിക പ്രഭാവം പ്രകടിപ്പിച്ചു 8 പതിറ്റാണ്ട് ലോകത്തെ വിസ്മയിപ്പിച്ച ആ പണ്ഡിത തേജസ് 1852 ല്‍ അസ്തമിച്ചു. വെളിയംകോട് ജുമുഅത്ത്‌ പള്ളിക്ക് സമീപം മഹാന്‍ അന്ത്യ വിശ്രമം കൊള്ളുന്നു.

ശൈഖ് കുഞ്ഞഹമ്മദ്‌ മുസ്‌ലിയാര്‍ (ന.മ)-പുത്തന്‍പള്ളി

അഹ്ല്സ്സുന്നത്തി വല്‍ ജമാഅത്ത് എന്ന സത്യ പ്രസ്ഥാനം കേരളത്തിന്റെ മണ്ണില്‍ നട്ടു വളര്‍ത്തിയ സ്വഹാബികള്‍ മുതലിങ്ങോട്ടുള്ള മഹാരഥന്മാരുടെ ചരിത്രം എക്കാലത്തും പുനര്‍വായനക്ക് വിധേയമാക്കേണ്ടതാണ്. കേരളിയ ഇസ്‌ലാമിക ചരിത്രത്തിലെ എക്കാലത്തെയും പ്രശോഭിക്കുന്ന വെള്ളി നക്ഷത്രങ്ങളാണവര്‍. സയ്യിദന്മാരും ഔലിയാക്കളും ലോകോത്തര പണ്ഡിതന്മാരും നേതൃത്വം നല്‍കിയ സത്യ ദീനിന്റെ ദിവ്യ പ്രഭയെ നെഞ്ചിലേറ്റിയ പാരമ്പര്യമാണിവിടെ മുസ്‌ലിംകള്‍ക്കുള്ളത്. ഔലിയാക്കളുടെ ശ്രേണിയിലെ സൂര്യ ജ്യോതിസ്സായ ഒരു മഹാന്‍ അന്തിയുറങ്ങുന്ന ദേശമാണ് പെരുമ്പടപ്പ് പുത്തന്‍പള്ളി. .

പെരുമ്പടപ്പില്‍ മറ പെട്ട ശൈഖ് കുഞ്ഞഹമ്മദ്‌ മുസ്‌ലിയാര്‍ (ന.മ) ജനിച്ചത് കോഴിക്കോട്‌ ജില്ലയിലെ കൊടിയത്തൂരില്‍ കക്കാട് എന്ന പ്രദേശത്താണ്. ബാല്യ കാലത്ത്‌ തന്നെ അനിതര സാധാരണമായ ബുദ്ധിയും സ്വഭാവ മഹിമയും പ്രകടമായിരുന്നു.പാന്നൂര്‍ ദര്‍സില്‍ നിന്നും പ്രാഥമിക പഠനത്തിന് ശേഷം ബഹുമാനപ്പെട്ടവര്‍ സൈനുദ്ദീന്‍ മഖ്ദൂം (റ) വിന്റെ നിര്‍ദേശ പ്രകാരം പെരുമ്പടപ്പിലുള്ള സൈനുദ്ദീന്‍ റംലി എന്ന മഹാനായ ഒരു ഗുരു വര്യന്റെ ശിഷ്യത്വം സ്വീകരിച്ചു. വെളിയംകോട് ഉമര്‍ ഖാളിയെ പ്പോലുള്ള പ്രഗല്‍ഭരായിരുന്നു സഹപാഠികള്‍. തസവവ്വുഫിന്റെ അനര്‍ഘ മുത്തുകള്‍ ശേഖരിച്ചു തന്റെ വൈജ്ഞാനിക ദാഹം ആവോളം തീര്‍ത്തു.

കഠിനമായ ഇബാദതുകളിലൂടെയും ചിട്ടയോത്ത ജീവിത ക്രമത്തിലൂടെയും മഹാനവര്‍കള്‍ വിലായത്തിന്റെ ഔന്നത്യങ്ങള്‍ കീഴടക്കി. നിരവധി കറാമത്തുകള്‍ അദ്ദേഹത്തിന്റെ ജീവിതത്തില്‍ പ്രകടമായിരുന്നു. 1914 ജനുവരി മാസത്തില്‍ മഹാനവര്‍കള്‍ ഈ ലോകത്തോട് വിട പറഞ്ഞു. പെരുമ്പടപ്പ്‌ പുത്തന്‍പള്ളി മഖാമില്‍ ബഹുമാനപ്പെട്ടവര്‍ അന്ത്യവിശ്രമം കൊള്ളുന്നു. രോഗികള്‍ക്കും മറ്റും ആശ്വാസമായിരുന്ന മഹാനവര്‍കളുടെ തിരു സന്നിധിയിലേക്ക് വിശ്വാസികളുടെ ഒഴുക്ക് ഇന്നും അനുസ്യൂതം തുടര്‍ന്നു കൊണ്ടിരിക്കുന്നു.

മടവൂര്‍ സി.എം. വലിയ്യുല്ലാഹി

കോഴിക്കോട് നിന്ന് ഏകദേശം 22 കി.മീ.അകലെയാണ് മടവൂര്‍ എന്ന കൊച്ചു ഗ്രാമം. കോഴിക്കോട് വയനാട് റോഡില്‍ പടനിലത്ത് നിന്നും നരിക്കുനി റോഡില്‍ 3.5 കിലോ മീറ്റര്‍ സഞ്ചരിച്ചാല്‍ മടവൂരിലെത്താം.

ഹി. 1348 റ.അവ്വല്‍ 12 നാണ് ബഹുമാനപ്പെട്ട ഖുതുബുല്‍ ആലം ശൈഖ് മുഹമ്മദ്‌ അബൂബക്കര്‍ വലിയ്യുല്ലാഹില്‍ മടവൂരി (ന.മ.) ഭൂജാതനായത്.മാതാവ് ആയിശുമ്മ എന്നവരാണ്.ഉപ്പാപ്പ കുഞ്ഞി മാഹിന്‍ മുസ്‌ലിയാര്‍ അറിയപ്പെട്ട പണ്ഡിതനും സൂഫിവര്യനും വഫാത്ത് വരെ മടവൂരിലെ ഖാസിയും ആയിരുന്നു.പിതാവ് കുഞ്ഞി മാഹിന്‍ കോയ മുസ്‌ലിയാരും പ്രോജ്ജ്വല വാഗ് മിയും പണ്ഡിതനും മുദരിസും മടവൂരിലെ ഖാസിയുമായിരുന്നു. കുഞ്ഞി മാഹിന്‍ കോയ മുസ്‌ലിയാര്‍ ഹജ്ജിനു പോയ സമയത്ത് ജനിക്കാന്‍ പോകുന്ന സന്താനത്തെ ക്കുറിച്ച് സ്വപ്നദര്‍ശനം ഉണ്ടായി. “സഹ ധര്‍മ്മിണി ഗര്‍ഭം ധരിച്ചിരിക്കുന്നു. ആണ്‍ കുട്ടിയാണ്.പ്രസവിക്കപ്പെട്ടാല്‍ മുഹമ്മദ്‌ അബൂബക്കര്‍ എന്ന് നാമകരണം ചെയ്യുക എന്നായിരുന്നു സ്വപ്നം”.

അദ്ധ്യായനം ബിസ്മി ചൊല്ലിക്കൊടുത്തു ആരംഭിച്ചത് പിതാവില്‍ നിന്ന് തന്നെയാണ്. അധികം താമസിയാതെ പിതാവ് മരണപ്പെട്ടു. വെളത്തേടത്ത് പറമ്പിലെ പ്രൈമറി സ്കൂള്‍ ആയിരുന്നു ആദ്യത്തെ വിദ്യാഭ്യാസ സ്ഥാപനം.അന്നത്തെ ഓത്ത്‌ പള്ളിയും എഴുത്ത് പള്ളിയും അത് തന്നെ ആയിരുന്നു. പിന്നീട് മടവൂര്‍ യു.പി .സ്കൂളിലും പഠിച്ചു. മടവൂര്‍ ജുമുഅത്ത്‌ പള്ളിയില്‍ നിന്നാണ് ദര്‍സ്‌ പഠനം ആരംഭിക്കുന്നത്. പിതാവ് കുഞ്ഞിമാഹിന്‍ കോയ മുസ്‌ലിയാര്‍, മോങ്ങം അവറാന്‍ മുസ്‌ലിയാര്‍, മലയമ്മ അബൂബക്കര്‍ മുസ്‌ലിയാര്‍ എന്നിവര്‍ മടവൂരില്‍ ഓതി പ്പഠിച്ച കാലത്ത് ഉസ്താദുമാരായിരുന്നു. കൊടുവള്ളി ദര്‍സില്‍ കുറ്റിക്കാട്ടൂര്‍ ഇമ്പിച്ചാലി മുസ്‌ലിയാര്‍ ആയിരുന്നു ഉസ്താദ്. കുറച്ചു കാലം ഉള്ളാളത്ത് പഠിച്ചിട്ടുണ്ട്. കൊയിലാണ്ടി കുഞ്ഞി മുഹമ്മദ്‌ മുസ്‌ലിയാരുടെ അടുത്ത് നിന്നാണ് ഉപരി പഠനാര്‍ത്ഥം വെല്ലൂര്‍ ബാഖിയാത്തിലേക്ക് പോയത്‌ . 1957-1959 ലാണ് വെല്ലൂരില്‍ പഠിച്ചത്.

ബാഖിയാത്തില്‍ നിന്നും ബിരുദ പഠനം പൂര്‍ത്തിയാക്കി 1960 ല്‍ മടവൂര്‍ ജുമുഅത്ത്‌ പള്ളിയില്‍ മുദരിസും ഖാസിയുമായി അധ്യാപനം ആരംഭിച്ചു. 1962 ലാണ് ഹജ്ജ്‌ യാത്ര പോയത്‌. ഹിജ്രാബ്ദം 1382 ശവ്വാല്‍ 14 നു മാതുലനായ അബൂബക്കര്‍ ഹാജിയുടെ പുത്രിയായ സൈനബയെ വിവാഹം കഴിച്ചു.

ശൈഖുനായുടെ സ്വഭാവം അവര്‍ണനീയവും മഹത്തരവു മായിരുന്നു.വിദ്യാര്‍ത്ഥിയായിരുന്ന കാലഘട്ടത്തില്‍ തന്നെ ഒരു വിദ്യാര്‍ത്ഥിക്കു ണ്ടായിരിക്കേണ്ട എല്ലാ ഗുണങ്ങളും ആ ജീവിതത്തില്‍ പ്രതിഫലിച്ചു.മുദരിസായി ജോലി ഏറ്റെടുത്തപ്പോള്‍ സത്യം,നീതി, .സഹിഷ്ണുത,സഹനം ധൈര്യം, സ്ഥൈര്യം തുടങ്ങിയ സദ്‌ ഗുണങ്ങള്‍ ശൈഖുനായില്‍ ദര്‍ശിക്കാമായിരുന്നു.മുതഅല്ലിമീങ്ങളോട് അതിരറ്റ സ്നേഹം വച്ച് പുലര്‍ത്തി.കയ്യിലുള്ളത് മുഴുവന്‍ ആവശ്യക്കാര്‍ക്ക്‌ കൊടുക്കുന്ന പതിവുണ്ടായിരുന്ന മഹാന്‍ അംഗവൈകല്യമുള്ളവരോടും അഹ് ലുബൈത്തിനോടും പ്രത്യേകം താല്‍പര്യം പ്രകടിപ്പിച്ചു.

അക്കാലത്തെ അറിയപ്പെട്ട മഹത്തുക്കളുമായും സാദാതീങ്ങളുമായും അടുത്ത ബന്ധം വച്ചു പുലര്‍ത്തിയ ശൈഖുനായുടെ ജീവിതം മുഴുവന്‍ അത്ഭുതങ്ങളുടെ കലവറയായിരുന്നു. ദര്‍സില്‍ ഓതി പഠിക്കുന്ന കാലം തൊട്ട് നിരവധി കറാമത്തുകള്‍ക്ക് ഉടമയാണ്. അശരണര്‍ക്കും രോഗികള്‍ക്കും താങ്ങും തണലുമായി വര്‍ത്തിച്ച മഹാനവര്‍കളുടെ ധന്യ ജീവിതത്തിലെ അത്ഭുത സംഭവങ്ങള്‍ പൂര്‍ണ്ണമായി വിവരിക്കാന്‍ സാധ്യമല്ല.

1411 ശവ്വാല്‍ 4 ന് 1991 ഏപ്രില്‍ 1 വെള്ളിയാഴ്ച മഹാനവര്‍കള്‍ ഈ ലോകത്ത്‌ നിന്നും യാത്രയായി. മടവൂര്‍ ജുമുഅത്ത്‌ പള്ളിക്ക് സമീപം പിതാവിന്റെ ഖബറിടത്തിനടുത്തായി ശൈഖുനാ അന്ത്യ വിശ്രമം കൊള്ളുന്നു. ജീവിത കാലത്തെന്നപോലെ ഇന്നും നിരവധി ആളുകള്‍ ആ തിരു സന്നിധിയിലെത്തുന്നു.

സയ്യിദത്തു ന്നിസാ ബീമാ ബീവി, ശഹീദ് മാഹീന്‍ അബൂബക്കര്‍ – ബീമാപള്ളി

ഇസ്‌ലാമിക സംസ്കൃതിയുടെ ഈറ്റില്ലമായ അറേബ്യയിലെ ഖുറൈശി ഗോത്രത്തിലാണ് ബീമാ ബീവി (റ) ജനിച്ചത്. ഖുര്‍ആന്‍ , ഹദീസ് , ഫിഖ്‌ഹ് എന്നീ വിജ്ഞാന ശാഖകളില്‍ അവഗാഹം നേടിയ ബീമാ ബീവി തഖ്‌വയുള്ള ജീവിതം നയിച്ചു. അബ്ദുല്‍ ഗഫ്ഫാര്‍ എന്ന സാത്വികനായ യുവാവായിരുന്നു ബീമാ ബീവിയുടെ ഭര്‍ത്താവ്.

അബ്ദുല്‍ ഗഫ്ഫാര്‍ ബീമാബീവി ദമ്പതികള്‍ ആരാധനയോടൊപ്പം ആതുരസേവനവും നടത്തിയിരുന്നു. മാറാവ്യാധി രോഗങ്ങള്‍ക്ക് ഖുര്‍ആനിലെ ആയത്തുകളും ദിക്റുകളും മറ്റും മന്ത്രിച്ചു സുഖപ്പെടുത്തി. ആ മാതൃകാ ദമ്പതികള്‍ക്ക് പിറന്ന അനുഗ്രഹീത ബാലനാണ് മാഹീന്‍ അബൂബക്കര്‍. എന്നാല്‍ മാഹീന്‍ അബൂബക്കര്‍ ബാല്യ ദശ പിന്നിടുന്നതിന് മുമ്പ് തന്നെ പിതാവ് ഇഹലോകവാസം വെടിഞ്ഞു.

ബാല്യത്തില്‍ തന്നെ അനാഥത്വം പേറി മാഹീന്‍ അബൂബക്കര്‍ ഉമ്മയുടെ ശിക്ഷണത്തില്‍ വളര്‍ന്നു. ഭര്‍ത്താവിന്റെ വിയോഗ ശേഷവും ആതുരസേവനം തുടര്‍ന്നു വന്ന ബീമാ ബീവിക്ക് പ്രബോധനാര്‍ത്ഥം ഇന്ത്യയിലേക്ക് യാത്രയാകാന്‍ സ്വപ്ന ദര്‍ശനമുണ്ടായി. പ്രതികൂല സാഹചര്യങ്ങളെ മറികടന്ന് അല്ലാഹുവിലഭയം തേടി ആ മാതാവും മകനും ഇന്ത്യയിലേക്ക് യാത്ര തിരിച്ചു.

ഇന്ത്യയിലെത്തിയ ബീമാബീവിയും മകന്‍ മാഹീന്‍ അബൂബക്കറും ആതുര ശുശ്രൂഷയും പ്രബോധനവുമായി രാജ്യത്തുടനീളം സഞ്ചരിച്ചു. യാത്രയില്‍ കേരളത്തില്‍ മാഹിയിലാണ് അവരാദ്യം എത്തിയത്. കേരളത്തിലും വിവിധ സ്ഥലങ്ങളില്‍ ഇസ്‌ലാമിക പ്രബോധന ദൌത്യവുമായി അവര്‍ സഞ്ചാരം തുടര്‍ന്നു. ഒടുവില്‍ തിരുവിതാംകൂറിലെ തിരുവല്ലം താമസ കേന്ദ്രമാക്കി. അന്ന് തിരുവിതാംകൂര്‍ ഭരിച്ചിരുന്നത് മാര്‍ത്താണ്ഡവര്‍മ്മയായിരുന്നു. ക്രിസ്താബ്ദം 1478 മുതല്‍ 1528 വരെയാണ് മാര്‍ത്താണ്ഡവര്‍മ്മയുടെ ഭരണ കാലം.

മാറാവ്യാധികള്‍ സുഖപ്പെടുത്തിയും ദീനീ പ്രബോധനവും ആരാധനകളുമായി ബീമാബീവിയും മകനും തങ്ങളുടെ ദൌത്യ നിര്‍വ്വഹണം തുടര്‍ന്നു. നാളുകള്‍ കഴിയും തോറും കൂടുതലാളുകള്‍ സത്യവിശ്വാസത്തിലാ കൃഷ്ടരായി ഇസ്‌ലാം ആശ്ലേഷിച്ചു. അധികാരം കയ്യാളിയിരുന്ന പ്രമാണിമാര്‍ക്ക് ഇതൊന്നും സഹിച്ചില്ല. അവര്‍ ബീമാ ബീവിയെയും മകനെയും ഭീഷണിപ്പെടുത്തി . രാജ്യം വിട്ടു പോകാന്‍ ആവശ്യപ്പെട്ടു. വഴങ്ങാതായപ്പോള്‍ മുസ്‌ലിംകള്‍ക്കെതിരെ ഏകപക്ഷീയമായി ആക്രമണം നടത്തി. ഗത്യന്തരമില്ലാതെ മാഹീന്‍ അബൂബക്കറിന്റെ നേതൃത്വത്തില്‍ മുസ്ലിംകള്‍ പ്രതിരോധിച്ചു. ആ പോരാട്ടത്തില്‍ മാഹീന്‍ അബൂബക്കര്‍ രക്ത സാക്ഷിയായി. മാഹീന്‍ അബൂബക്കറിന്റെ മരണത്തെത്തുടര്‍ന്ന് 40 ാംദിവസം ബീമാബീവിയും വഫാത്തായി. ഗതകാല സ്മരണകളുമായി തലയുയര്‍ത്തി നില്‍ക്കുന്ന ബീമാപള്ളി യില്‍ ആ മഹത് വ്യക്തിത്വങ്ങള്‍ അന്തിയുറങ്ങുന്നു. തിരുവനന്തപുരം ജില്ലയിലെ അറിയപ്പെട്ട തീര്‍ത്ഥാടന കേന്ദ്രമാണ് ബീമാപള്ളി.

മലപ്പുറം ശുഹദാക്കള്‍ മഖാം

മലപ്പുറം. സഹാദര്യവും മതമൈത്രിയും കളിയാടുന്ന സംഘര്‍ഷ രഹിത ഭൂമി. വര്‍ഗീയതയോടും തീവ്ര വാദത്തോടും വിട്ടുവീഴ്ച ചെയ്യാത്ത നാട്. സ്വാതന്ത്ര്യ സമര പോരാട്ടത്തിന്റെ ഇന്നലെകള്‍ സമ്മാനിച്ച വീറുറ്റ ഓര്‍മകളെ നെഞ്ചിലേറ്റുന്ന സമൂഹം. ഇത് ധീര രക്ത സാക്ഷികളുടെ രക്തം വീണു ചുവന്ന മണ്ണ്.

സമാധാനപ്രേമികളായ ഒരു സമൂഹം നേരിടേണ്ടി വന്ന കഷ്ടപ്പാടിന്റെയും സഹനത്തിന്റെയും കഥകള്‍ നമ്മോട് പറയുകയാണ്‌ മലപ്പുറം. ഒരു കാലത്ത്‌ സാമൂതിരിപ്പാടിന്റെ കീഴില്‍ നാടുവാഴിയായി പാറനമ്പി ഭരിച്ചിരുന്നു ഇവിടെ. സാമൂതിരിയെപ്പോലെ തന്നെ പാറനമ്പിയും മുസ്‌ലിംകളോട് പ്രത്യേക താല്‍പര്യവും സ്നേഹവും വച്ചു പുലര്‍ത്തിയിരുന്നു. പാറനമ്പിയുടെ ഭരണത്തില്‍ മുസ്‌ലിംകള്‍ സഹായികളുമായിരുന്നു. ഇതൊന്നും സവര്‍ണര്‍ക്ക് രസിച്ചില്ല . അവര്‍ പാറനമ്പിയെ പിന്തിരിപ്പിക്കാന്‍ ശ്രമിച്ചെങ്കിലും നിഷ്ഫലമായി. എല്ലാവരില്‍ നിന്നും നികുതി പിരിക്കുകയും നികുതി നല്‍കാത്തവരെ തടവില്‍ വെക്കുകയുമായിരുന്നു അന്നത്തെ നിയമം. സാമൂതിരിയുടെ നികുതി പിരിവുകാരനായ അലി മരക്കാര്‍ നികുതി നല്‍കാത്ത സവര്‍ണരില്‍ പെട്ട ഒരാളെ തടവില്‍ വച്ചതാണ് മലപ്പുറം സംഭവത്തിന്റെ തുടക്കം.

അലിമരക്കാരെ തന്ത്രപരമായി വധിക്കാന്‍ പദ്ധതി ഒരുക്കുകയായിരുന്നു ചിലര്‍. തുടര്‍ന്ന് നായര്‍ പടയാളികളും അലിമരക്കാരും തമ്മില്‍ ഏറ്റുമുട്ടി . സഹായത്തിനെത്തിയ കുഞ്ഞഹമ്മദും അലിമരക്കാരോടൊപ്പം കൊല്ലപ്പെട്ടു. നായര്‍ പടയിലൊരു വിഭാഗവും കൊല്ലപ്പെടുകയുണ്ടായി . ഇതോടെ പാറനമ്പിയെ ചിലര്‍ തെറ്റിദ്ധരിപ്പിച്ച് മുസ്‌ലിംകള്‍ക്കെതിരാക്കി മാറ്റി. മുസ്‌ലിംകളുടെ കൈവശമുണ്ടായിരുന്ന വയലും തോട്ടങ്ങളും ബലമായി ഒഴിപ്പിക്കാനും മുസ്‌ലിം കോളനിയും പള്ളിയും ചുട്ടെരിക്കാനും ഉത്തരവിട്ടു. അവര്‍ ഒരു യുദ്ധത്തിനു തന്നെ വട്ടം കൂട്ടുകയായിരുന്നു. ഇതോടെ മുസ്‌ലിംകള്‍ ഭയചകിതരായി . സ്ത്രീകളെയും കുട്ടികളെയും നാടു കടത്തി . ബാക്കിയുള്ളവര്‍ പള്ളിയില്‍ അഭയം തേടി. പാറനമ്പിയോട് സമാധാന തിനപെക്ഷിച്ചെങ്കിലും ഫലമുണ്ടായില്ല.

പാറനമ്പിയുടെ സൈന്യം പള്ളി ഉപരോധിച്ചു.കുടി വെള്ളം പോലും മലിനമാക്കപ്പെട്ടു. ഗതിയില്ലാതെ വന്നപ്പോള്‍ മുസ്‌ലിംകള്‍ വിശുദ്ധ യുദ്ധത്തിനു സന്നദ്ധരായി. പാരംഭ ഘട്ടത്തില്‍ തോറ്റോടിയ നായര്‍ പട വന്‍ സന്നാഹവുമായി തിരിച്ചെത്തി 44 മുസ്‌ലിംകളെയും കൊലപ്പെടുത്തി. അവസാന മുസ്‌ലിമും രക്ത സാക്ഷിയായത്തിനു ശേഷം അവര്‍ പള്ളി ചുട്ടെരിച്ചു.കിഴിശ്ശേരിയില്‍ നിന്നുമെത്തിയ ജലാലുദ്ദീന്‍ മൂപ്പനും സംഘവുമാണ് രക്ത സാക്ഷികളുടെ ജനാസ ഖബറടക്കിയത്. മലപ്പുറം വലിയങ്ങാടി പള്ളിയുടെ തെക്ക് വശത്തായി ശുഹദാക്കള്‍ അന്ത്യ വിശ്രമം കൊള്ളുന്നു.

സൈനുദ്ദീന്‍ മഖ്ദൂം ഒന്നാമന്‍, പൊന്നാനി

പൊന്നാനി. “മലബാറിന്റെ മക്ക” എന്നറിയപ്പെടുന്ന ദേശം. പൊന്‍ നാണയം ലോപിച്ചാണ് പൊന്നാനിയായത്. മഖ്ദൂമുമാരുടെ പാദസ്പര്‍ശം കൊണ്ടനുഗ്രഹീതമായ പൊന്നാനി ഇസ്ലാമിക വിജ്ഞാനങ്ങളുടെ കലവറയാണ്. ഒട്ടേറെ പണ്ഡിത ശിരോമണികളെ വാര്‍ത്തെടുത്ത ഈ പുണ്യ ദേശത്തിന്റെ സുവര്‍ണ ചരിത്രങ്ങളുടെ നിത്യ സ്മാരകങ്ങളായി പൊന്നാനി വലിയ ജുമുഅത്ത്‌ പള്ളിയും മഖ്ദൂമുമാരുടെ മഖ്ബറയും.

സൈനുദ്ദീൻ മഖ്ദൂം ഒന്നാമൻ ഹിജ്റ 871 ശഹബാൻ 12 വ്യാഴാഴ്ച്ച (എ.ഡി.1467) പ്രഭാത കൊച്ചിയിലെ കൊച്ചങ്ങാടിയിലെ മഖ്ദൂമിയ ഭവനത്തിൽ ജനിച്ചു. മഹനവർകളുടെ പിതാമഹനായ ശൈഖ് അഹ്മദ് ആണു ആദ്യമായി കൊച്ചിയിലെത്തുന്നത്. മഖ്ദൂമുമാരുടെ പരമ്പര ചെന്നെത്തുന്നത് ഒന്നാം ഖലീഫയായ അബൂബക്കർ സിദ്ദീഖ് (റ)ലാണു. ഹിജ്റ ആറാം നൂറ്റാണ്ടിലാണു സൈനുദ്ദീൻ മഖ്ദൂമിന്റെ പിതാമഹർ ദക്ഷിണ യമനിൽ നിന്നും ഇന്ത്യയിലെത്തിയതെന്നാണു വിശ്വസിക്കപ്പെടുന്നത്. മഅബറിൽ നിന്നും കൊച്ചിയിലെത്തിയ ശൈഖ് അഹ്`മദ് അൽ മഅബരിയുടെ പുത്രന്മാരിലൊരാളായ സൈനുദ്ദീൻ ഇബ്രാഹീം അൽ മഅബരിയായിരുന്നു കൊച്ചിയിലെ ഖാസി. പൊന്നനിയിലെ പൗര പ്രമുഖരുടെ ക്ഷണവും നിർബന്ധവും പൊന്നാനിയിലെ ഖാസി സ്ഥാനമേറ്റെടുക്കുകയും പൊന്നാനിയിൽ എത്തുകയും ചെയ്യാൻ ഒരു നിമിത്തമായി. ഈ സംഭവം പൊന്നാനിയുടെ സുവർണ്ണ ചരിത്രത്തിന്റെ തുടക്കം കുറിച്ചു.

പതിനാലാം വയസ്സിലാണു സൈനുദ്ദീൻ മഖ്ദൂം ഉപരി പഠനാർത്ഥം പൊന്നാനിയിൽ എത്തിയത്. പിതാവായ അലിയ്യുൽ മഅബരിയിൽ നിന്നും കൊച്ചിയിൽ വച്ചു തന്നെ പ്രാഥമിക വിദ്യാഭ്യാസം അഭ്യസിച്ചിരുന്നു. പൊന്നാനിയിലും കോഴിക്കോട്ടും മക്കത്തും ഉപരി പഠനം നടത്തിയതിനു ശേഷം ഈജിപ്തിലെ അല്‍ അസ്ഹര്‍ യൂണിവേഴ്സിറ്റിയിലെത്തി. ഇന്ത്യയില്‍ നിന്നും അസ്ഹറിലെത്തുന്ന ആദ്യ ഇന്ത്യന്‍ വിദ്യാര്‍ത്ഥിയും മഹാനവര്‍കളാണ്. അല്‍ അസ്ഹറിന്റെ മാതൃകയില്‍ കേരളത്തില്‍ ഒരു മസ്ജിദ്‌ സ്ഥാപിച്ച് അസ്ഹറിലെ സിലബസ്സും സനദ്‌ ദാനവും അദ്ദേഹം കേരളത്തിനു സമ്മാനിച്ചു. പള്ളി ദര്‍സുകളുടെ ഉപജ്ഞാതാവും മഹാനവര്‍കളാണ്.

ഹിജ്റ 925(എ.ഡി.1519)നാണു വലിയ ജുമുഅത്ത് പള്ളിയുടെ ഉത്ഘാടനം നടന്നത്. 90 അടി നീളവും 60 അടി വീതിയുമുണ്ട് മസ്ജിദിന്റെ ഉൾഭാഗത്തിനു. നിരവധി പ്രഗത്ഭ പണ്ഡിത ശിരോമണികള വാർത്തെടുക്കാൻ ഈ മസ്ജിദിനു സാധിച്ചു. നികുതി നിഷേധ പ്രസ്ത്ഥാനത്തിനു തുടക്കം കുറിച്ച ഉമർ ഖാസി, അനുഗ്രഹീത കവിയും തത്വ ജ്ഞാനിയുമായ കുഞ്ഞായിൻ മുസ്ലിയാർ, 1921 മലബാർ സമര നായകൻ ആലി മുസ്ലിയാർ തുടങ്ങിയവർ അവരിൽ ചിലരാണു.

പോര്‍ച്ചുഗീസുകാരുടെ ക്രൂരതയില്‍ പൊറുതി മുട്ടിയ കേരളീയ ജനതയെ ചെറുത്ത് നില്‍പ്പിന് പ്രാപ്തരാക്കാന്‍ തന്റെ രചനാ പാടവം സൈനുദ്ദീന്‍ മഖ്ദൂം ഒന്നാമന്‍ ഉപയോഗപ്പെടുത്തി . പോര്‍ച്ചുഗീസുകാരെ ഇന്ത്യന്‍ മണ്ണില്‍ നിന്നും തുരത്താന്‍ തഹ് രീള് എന്ന പദ്യത്തിലൂടെ അദ്ദേഹം ആഹ്വാനം ചെയ്തു. പോര്‍ച്ചുഗീസുകാര്‍ക്കെതിരെ സൈനിക സഹായത്തിനായി ഈജിപ്തിലേക്ക് കത്തയച്ചു. ഈജിപ്തില്‍ നിന്നുമെത്തിയ സൈന്യം പൊന്നാനിയില്‍ നിര്‍മിച്ച മസ്ജിദാണ് മിസ്‌രിപ്പള്ളി എന്നറിയപ്പെടുന്നത്.

കേരളത്തിന്റെ വിജ്ഞാന രംഗത്തിനു അന്താരാഷ്ട്ര അംഗീകാരം നേടിക്കൊടുത്ത ആ മഹാ പണ്ഡിതൻ ഹിജ്റ 928 ശഅബാൻ 16 വെള്ളിയാഴ്ച അർദ്ധ രാത്രിക്കു ശേഷം വഫാത്തായി. മസ്ജിദിന്റെ തെക്ക് കിഴക്ക്‌ ഭാഗത്തുള്ള മതില്‍ക്കെട്ടിനകത്ത് മഖ്ദൂമുമാരുടെ മഖ്ബറ കാണാം.

സൈനുദ്ദീന്‍ മഖ്ദൂം രണ്ടാമന്‍

മലബാറിന്റെ പെരുമ ലൊകമെങ്ങും പരത്തിയ വിശ്രുത പണ്ഡിതനാണ് സൈനുദ്ദീന്‍ മഖ്ദൂം രണ്ടാമന്‍ എന്നറിയപ്പെടുന്ന ശൈഖ് അഹമ്മദ് സൈനുദ്ദീന്‍ മഖ്ദൂം. ഹിജ്റ 938 (എ.ഡി.1531) ല്‍ മാഹിയിലെ ചോമ്പാലില്‍ ജനിച്ചു. ശൈഖ് സൈനുദ്ദീന്‍ കബീറിന്റെ മൂന്നാമത്തെ പുത്രന്‍ മുഹമ്മദുല്‍ ഗസ്സാലിയാണ് പിതാവ്.

ഖുര്‍ആന്‍ പ്രാഥമിക വിജ്ഞാനങ്ങള്‍ എന്നിവ പിതാവില്‍ നിന്നു തന്നെയാണ് കരസ്ഥമാക്കിയത്. പിന്നീട് ഉപരി പഠനാര്‍ത്ഥം പൊന്നാനിയിലെത്തി. പൊന്നാനി വലിയ ജുമുഅത്ത് പള്ളിയിലെ ദര്‍സില്‍ മൗലാനാ ഇസ്മാഈല്‍ ബാദുക്കലി (ബട്ക്കല്‍) ആയിരുന്നു ഗുരുനാഥന്‍. അനന്തരം ശൈഖ് അബ്ദുല്‍ അസീസ് മഖ്ദൂമില്‍ നിന്നും അനേകം കിതാബുകള്‍ ഓതി. പൊന്നാനിയില്‍ വച്ച് ഖുര്‍ആന്‍ ഹൃദിസ്ഥമാക്കി. പിന്നീട് മക്കയിലെത്തി മസ്ജിദുല്‍ ഹറമിലെ ദര്‍സില്‍ ചേര്‍ന്നു. ശൈഖ് അല്‍ ഇമാം അല്ലാമാ മുഹദ്ദിസുശ്ശഹീര്‍ അല്‍ ഹാഫിസ് ശിഹാബുദ്ദീന്‍ അഹമ്മദ് ഇബ്നു ഹജറുല്‍ ഹൈതമിയായിരുന്നു ഗുരുനാഥന്‍. ശൈഖ് ഇസ്സുദ്ദീന്‍ ഇബ്നു അബ്ദുല്‍ അസീസ് അസ്സുമരി, അല്ലാമാ വജീഹുദ്ദീന്‍ അബ്ദു റഹ്മാനുബ്നു സിയാദ്, ശൈഖ് മുഹമ്മദ് ഇബ്നു അഹമദ് റംലി, ശൈഖ് അബ്ദു റഊഫുല്‍ മക്കിയ്യി എന്നിവര്‍ ഗുരു നാഥന്മാരാണ്. പത്ത് വര്‍ഷത്തോളം വിജ്ഞാന സമ്പാദനത്തിനായി മക്കയില്‍ ചിലവഴിച്ചു. കര്‍മ്മശാസ്ത്രത്തിലും ഹദീസിലും വ്യുല്‍പ്പത്തി നേടിയ മഹാനവര്‍കളെ ഹറമിലെ ഉലമാക്കള്‍ മുഹദ്ദിസ് എന്നു വിളിച്ചിരുന്നു. ഖാദിരീ ത്വരീഖത്തും ദല്‍വീഷിന്റെ സ്ഥാന വസ്ത്രവും സ്വീകരിച്ചത് ശൈഖ് മുഹമ്മദുല്‍ സിദ്ദീഖി ബകരി (റ) വില്‍ നിന്നാണു. അറബി, ഉറുദു, പേര്‍ഷ്യന്‍ ഭാഷകളില്‍ നൈപുണ്യം നേടിയ ശൈഖവര്‍കള്‍ ഉലമാക്കള്‍ക്കിടയില്‍ ഖ്യാതി നേടിയിരുന്നു.

മക്കയില്‍ നിന്നും പഠനം പൂര്‍ത്തിയാക്കി പൊന്നാനിയിലേക്ക് യാത്ര തിരിച്ചു. പ്രധാന ഗുരുവായ ഇബ്നു ഹജറുല്‍ ഹൈതമിയൊടൊപ്പമായിരുന്നു യാത്ര. ശൈഖ് സൈനുദ്ദീന്‍ മഖ്ദൂം രണ്ടാമന്റെ പിതാവിന്റെ ഖബര്‍ സന്ദര്‍ശനമായിരുന്നു സന്ദര്‍ശനോദ്ദേശം. പൊന്നാനിയിലെ രണ്ടു മാസക്കാലത്തെ താമസത്തിനിടക്ക് മഹാനവര്‍കള്‍ ഖുര്‍ആന്‍ വ്യാഖ്യാന ശാസ്ത്രം, ഹദീസ്, മറ്റു വിജ്ഞാന ശാഖകള്‍ എന്നിവയില്‍ വലിയ ജുമുഅത്ത്‌ പള്ളിയില്‍ അധ്യാപനവും നടത്തി. മഹാനവര്‍കള്‍ പൊന്നാനിയില്‍ വന്നപ്പോള്‍ കൊണ്ടുവന്ന കല്ല്‌ തൂക്കിയിട്ട ചങ്ങല വിളക്കിനു താഴെ സ്ഥാപിച്ചിരിക്കുന്നു. ആ കല്ലിനു മുകളിലാണ് തിരിവിളക്കില്‍ ഒഴിക്കാനുള്ള എണ്ണപ്പാത്രം വെച്ചിരിക്കുന്നത്. ഇന്നും ആ വിളക്കിന്റെ പ്രകാശ ധാരക്ക് ചുറ്റും ഇരുന്നാണ് വിദ്യാര്‍ത്ഥികള്‍ വിജ്ഞാനത്തിന്റെ മധു നുകരുന്നത്.

മക്കയില്‍ നിന്നും തിരിച്ചെത്തിയ ശൈഖ് സൈനുദ്ദീന്‍ മഖ്ദൂം രണ്ടാമന്‍ പൊന്നാനിയിലെ വലിയ പള്ളിയില്‍ മുദരിസായി അധ്യാപനം ആരംഭിച്ചു. ഈ അതി ശ്രേഷ്ഠനായ ഗുരു പ്രസംഗ കലയിലും എഴുത്തിലും നിപുണനായിരുന്നു. രാഷ്ട്രീയ കാര്യങ്ങളില്‍ സാമൂതിരി രാജാവിനെ സഹായിക്കുകയും പോര്‍ചുഗീസുകാര്‍ക്കെതിരെ മാപ്പിള മുസ്‌ലിംകളെയും മുസ്‌ലിം രാജാക്കന്മാരെയും സംഘടിപ്പിക്കുന്നതില്‍ വ്യാപൃതനാവുകയും ചെയ്തു. മുഗള്‍ചക്രവര്‍ത്തി അക്ബര്‍ ഷാ, ബീജാപ്പൂര്‍ സുല്‍ത്താന്‍ ആദില്‍ ഷാ, തുര്‍ക്കി സുല്‍ത്താന്‍ എന്നിവരൊടൊക്കെ അടുത്ത ബന്ധം പുലര്‍ത്തി. പോര്‍ച്ചുഗീസുകാര്‍ക്കെതിരെ ആഗോള കൂട്ടായ്മക്കായ് പരിശ്രമിച്ചു.

ശൈഖവര്‍കളുടെ അനുഗ്രഹീത തൂലികയില്‍ നിന്നും ഇസ്ലാമിക ലോകത്തിനു ഒട്ടനവധി വിശിഷ്ട ഗ്രന്ഥങ്ങള്‍ ലഭിച്ചു. അവയില്‍ ഏറ്റം പ്രശസ്ഥമാണ് ‘ഫത്ഹുല്‍ മുഈന്‍ ബി ശറഇ ഖുര്‍റത്തില്‍ ഐന്‍’ എന്ന ശാഫിഈ മദ്ഹബിലെ കര്‍മ്മ ശാസ്ത്ര ഗ്രന്ഥം. ഫത്ഹുല്‍ മുഈന്‍ നിരവധി ഭാഷകളിലേക്കു വിവര്‍ത്തനം ചെയ്യപ്പെട്ടിട്ടുണ്ട്. അഹ്കാമുന്നികാഹ്, മന്‍ഹജുല്‍ വാളിഹ്, അജ് വിബത്തുല്‍ അജീബ, ശറഹു സ്സുദൂര്‍, അല്‍ ജവാഹിര്‍ ഫീ ഉഖൂബത്തി അഹ് ലില്‍ കബാഇര്‍, ഫതാവല്‍ ഹിന്ദിയ്യ തുടങ്ങി നിരവധി ഗ്രന്ഥങ്ങള്‍ വേറെയും മഹാനവര്‍കള്‍ രചിച്ചു .

കേരളത്തിന്റെ പ്രഥമ ചരിത്രകാരന്‍ കൂടിയാണ് ശൈഖവര്‍കള്‍. തുഹ്ഫതുല്‍ മുജാഹിദീന്‍ ഫീ അഖ്ബാരില്‍ ബുര്‍തുഗാലിയ്യീന്‍ ( പോര്‍ച്ചുഗീസ് വിരുദ്ധ പോരാളികള്‍ക്ക് ഒരു ഉപഹാരം) എന്ന ഗ്രന്ഥമാണ് കേരളത്തിന്റെ അറിയപ്പെട്ട ആദ്യത്തെ ചരിത്ര ഗ്രന്ഥം. പോര്‍ച്ചുഗീസ് അതിക്രമങ്ങള്‍ക്കെതിരില്‍ സാമൂതിരിയൊടൊപ്പം ചേര്‍ന്നു മുസ്‌ലിംകളെ സായുധ സമരത്തിനു ആഹ്വാനം ചെയ്യുകയാണീ കൃതിയില്‍. ബീജാപ്പൂര്‍ സുല്‍ത്താന്‍ ആദില്‍ഷായുടെ മുമ്പിലാണീ ഗ്രന്ഥം സമര്‍പ്പിക്കപ്പെട്ടത്. ഈ ഗ്രന്ഥം ഇംഗ്ലീഷ്, ഫ്രഞ്ച്, സ്പാനിഷ്, ഉര്‍ദു തുടങ്ങിയ മിക്ക ലോക ഭാഷകളിലേക്കും ഭാഷാന്തരം ചെയ്യപ്പെട്ടിട്ടുണ്ട്.

സൈനുദ്ദീന്‍ മഖ്ദൂം രണ്ടാമന്‍ എക്കാലത്തെയും വിശ്രുത പണ്ഡിതനും ധീരനായ രാജ്യ സ്നേഹിയും മഹാനായ സാമൂഹ്യ പരിഷ്കര്‍ത്താവും ചരിത്രകാരനുമാണ്. മഹാനവര്‍കള്‍ വഫാത്തായത് ചോമ്പാലില്‍ വെച്ചാണ്. വടകരക്കടുത്ത കുഞ്ഞിപ്പള്ളി ഖബർസ്ഥാനിലാണ് അന്ത്യവിശ്രമം കൊള്ളുന്നത്. വഫാത്തായത് ഹിജ്റ 978 ( എ.ഡി. 1570 / 71)ലാണെന്നും അതല്ല 991( എ.ഡി. 1583 / 84) ലാണെന്നും അഭിപ്രായ വ്യത്യാസമുണ്ട്.

ഓമാനൂര്‍ ശുഹദാ മഖാം

ചരിത്രമുറങ്ങുന്ന പട്ടണമാണ് കൊണ്ടോട്ടി. ചരിത്രത്തിന്റെ മൂക സാക്ഷിയായി തലയുയര്‍ത്തി നില്‍ക്കുന്ന വലിയങ്ങാടി ജുമുഅത്ത്‌ പള്ളി . ഈ പള്ളിക്ക് സമീപം പ്രശസ്തരായ ഓമാനൂര്‍ ശുഹദാക്കള്‍ അന്ത്യവിശ്രമം കൊള്ളുന്നു. മലപ്പുറം ജില്ലയിലെ മുസ്‌ലിംകള്‍ അത്യാദര പൂര്‍വ്വം സ്മരിക്കുന്ന നാമമാണ് ഓമാനൂര്‍ ശുഹദാക്കളുടെത്. കുഞ്ഞാലി, മൊയ്തീന്‍, അബൂബക്കര്‍ എന്നീ മൂന്നു ധീര രക്തസാക്ഷികളാണവര്‍.

അമ്മാളു അമ്മ എന്ന ഒരു ഹിന്ദു സ്ത്രീ മുസ്‌ലിമായതിനെ തുടര്‍ന്ന് ഏതാനും അമുസ്‌ലിംകള്‍ പള്ളി അശുദ്ധമാക്കാന്‍ ശ്രമിച്ചതാണ് ഓമാനൂര്‍ യുദ്ധത്തിന്റെ തുടക്കം. ഭിന്നിപ്പിച്ചു ഭരിക്കുക എന്ന ബ്രിട്ടീഷ്‌ തന്ത്രമാണ് സംഭവത്തിന് എരി തീയില്‍ എണ്ണ ഒഴിച്ചത് ‌. മുസ്‌ലിം-ഹിന്ദു സാഹോദര്യം തകര്‍ത്തെറിയലായിരുന്നു വെള്ളക്കാരുടെ ലക്‌ഷ്യം. ബ്രിട്ടീഷ്‌ പട്ടാളമാണ് യുദ്ധം മൂര്‍ച്ച കൂടിയത്. അവര്‍ മുവ്വായിരത്തോളം പേര്‍ യാതൊരു മുന്നറിയിപ്പുമില്ലാതെ രംഗത്തെത്തി.

മുസ്‌ലിംകള്‍ നോക്കി നിന്നില്ല. പട്ടാളത്തെ ധീരമായിത്തന്നെ നേരിട്ടു. നിരവധി പട്ടാളക്കാരും മുസ്‌ലിം പക്ഷത്ത്‌ നിന്ന് മൂന്നു പേരും ശഹീദായി. ഹിജ്റ 1128 ദുല്‍ഹജ്ജ് ഏഴിനാണിത്. മലപ്പുറം കോഴിക്കോട്‌ ജില്ലകളില്‍ ദുല്‍ഹജ്ജ് 7 ന് ഓമാനൂര്‍ ശുഹദാക്കളുടെ നേര്‍ച്ച നടന്നു വരുന്നു. അന്നദാനം പ്രധാന ചടങ്ങായുള്ള നേര്‍ച്ചയില്‍ അന്യ മതസ്ഥരും സഹകരിക്കുന്നു.

കുഞ്ഞിമരക്കാര്‍ ശഹീദ്  - വെളിയംകോട്

ധീരനായ ദേശാഭിമാനിയും സ്വസമൂഹത്തിലെ അബലയായ ഒരു പെണ്‍ കിടാവിനെ രക്ഷിക്കാന്‍ ജീവന്‍ ബലിയര്‍പ്പിച്ച മഹാനായ രക്ത സാക്ഷിയുമാണ് കുഞ്ഞിമരക്കാര്‍ ശഹീദ്‌ അവര്‍കള്‍ . വെളിംകോട് ഉമര്‍ ഖാസിയുടെ മഖ്ബറയില്‍ നിന്നും അധികം വിദൂരമല്ലാതെ മഹാനവര്‍കളുടെ മഖ്ബറ കാണാം. പറങ്കികള്‍ മുസ്ലികളും അല്ലാത്തവരുമായ തദ്ദേശ വാസികള്‍ക്കെതിരെ നടത്തിയിരുന്ന ക്രൂരതകളും അക്രമങ്ങളും എത്രത്തോളമായിരുന്നു എന്ന് കുഞ്ഞിമരക്കാര്‍ ശഹീദിന്റെ ചരിത്രത്തിലൂടെ നമുക്ക് മനസ്സിലാക്കാം.

പിതാവിന്റെ പരി ലാളന യില്‍ ജീവിക്കാന്‍ ഭാഗ്യം ലഭിക്കാത്ത കുഞ്ഞിമരക്കാരെ പോറ്റി വളര്‍ത്തിയത്‌ ഉമ്മയാണ്. സൌമ്യ ശീലനും സല്‍സ്വഭാവി യുമായ മഹാനവര്‍കളെ ക്കുറിച്ച് സൈനുദ്ദീന്‍ മഖ്ദൂം ലോകം നിലനില്‍ക്കുന്നിടത്തോളം ഈ കുട്ടിയുടെ ഖ്യാതി നില നില്‍ക്കുമെന്ന് പ്രവചിച്ചിരുന്നുവത്രേ!.

കുഞ്ഞിമരക്കാര്‍ക്ക് യൌവ്വനമെതിയപ്പോള്‍ മകനെ ക്കൊണ്ട് വിവാഹം കഴിപ്പിക്കാന്‍ ഉമ്മ ആഗ്രഹിച്ചു . അങ്ങിനെ ആ മാതാവിന്റെ ആഗ്രഹ സഫലീകരണമെന്നോണം കുഞ്ഞി മരക്കാരിന്റെ വിവാഹ സുദിനം സമാഗതമായി . പറങ്കികള്‍ ഒരു മുസ്ലിം പെണ്‍ കുട്ടിയെ പിടിച്ചു കൊണ്ടുപോയി കപ്പലില്‍ പാര്‍പ്പിച്ചിരിക്കുന്ന വിവരം കുഞ്ഞി മരക്കാര്‍ ശഹീദിന്റെ കല്യാണ പന്തലിലുമെത്തി. എന്നാല്‍ ആയുധ സജ്ജരായ പറങ്കികളുമായി യുദ്ധം നടത്തി ആ പെണ്‍ കിടാവിനെ മോചിപ്പിക്കാന്‍ തദ്ദേശ വാസികള്‍ അശക്തരായിരുന്നു.

ഇത്തരമൊരു പ്രതിസന്ധി ഘട്ടത്തില്‍ എന്ത് ചെയ്യണ മെന്നറിയാതിരുന്ന ആ സദസ്സില്‍ നിന്നും ധീരനായ കുഞ്ഞി മരക്കാര്‍ തന്ത്രപൂര്‍വ്വം പുറത്തിറങ്ങി. മാതാവിന്റ അടുത്തെത്തി കാര്യങ്ങള്‍ ധരിപ്പിച്ചു. മാതാവിന്റെ നിര്‍ദേശപ്രകാരം കുഞ്ഞി മരക്കാര്‍ ആയുധമേന്തി പറങ്കിക്കപ്പല്‍ ലക്ഷ്യമാക്കി നീങ്ങി. കപ്പലില്‍ നിന്നും പെണ്‍കുട്ടിയെ മോചിപ്പിച്ചു കൂടെയുണ്ടായിരുന്ന തോണിക്കാരനെ ഏല്‍പ്പിച്ചു സുരക്ഷിതമായി കരയിലെത്തിക്കാന്‍ ചുമതലപ്പെടുത്തി. പിന്നീട് കുഞ്ഞിമാരക്കാരും നമ്മുടെ നാടിന്റെ ശത്രുക്കളായ പറങ്കികളുമായി ഘോര സംഘട്ടനം നടന്നു. പറങ്കികളെ ഓരോരുത്തരെയായി കുഞ്ഞി മരക്കാര്‍ വകവരുത്തി. എന്നാല്‍ മറഞ്ഞിരുന്ന ശത്രുവിന്റെ വെട്ടേറ്റ് ആ ധീര ദേശാഭിമാനി ശഹീദായി. ഏഴു കഷ്ണമാക്കി കുഞ്ഞി മരക്കാരുടെ ശരീരത്തെ പറങ്കി കടലില്‍ തള്ളി. അത് കൊണ്ട് തന്നെ ഏഴു സ്ഥലത്ത് മഹാനവര്‍കളുടെ മഖ്ബറ കാണാം.

(കടപ്പാട് – സത്യസരണി).

2 comments on “മഹാന്മാര്‍

  1. ക്രിസ്തുമസ് ആഘോഷത്തെപ്പറ്റിയുള്ള ചരിത്ര വസ്തുതകളെ പരസ്യമായി ചോദ്യം ചെയ്തു കൊണ്ട് ക്രിസ്തീയ സഭാ അദ്യക്ഷന്‍ ബനഡിക് 16 – മാര്പ്പാ പ്പ പുസ്തകം എഴുതി. ജന്മദിനം ഡിസംബര്‍ 25 ന് എന്നത് പുരോഹിതന്മാര്ക്ക് പറ്റിയ ഒരു തെറ്റാണെന്നും അദ്ദേഹം തുറന്നെഴുതി. മുഹമ്മദ്‌ നബി (സ) ജനിച്ചതായി പ്രചരിപ്പിക്കപ്പെടുന്ന റബീഉല്‍ അവ്വല്‍ 12 ഉം ഇതുപോലെ ചരിത്ര പരമായി തെളിയിക്കാന്‍ സാധിക്കില്ലന്നു ആരെങ്കിലും പറഞ്ഞാല്‍ എന്താകും അവസ്ഥ…???

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s